"Ən isti 10 il" açıqlandı

Ümumdünya Meteorologiya Təşkilatı (WMO) 2015-2024-cü illəri “ən isti 10 il” olaraq qeyd edib.

Sfera.az xarici mediaya istinadən xəbər verir ki, təşkilatın açıqlamasına görə, iqlim dəyişikliyinin təsirləri sürətlə artıb və 2024-cü ildə qlobal temperaturun 1850-1900-cü illər sənayedən əvvəlki dövrlə müqayisədə ilk dəfə olaraq 1,5 dərəcədən çox artıb.

Hesabatda qeyd edilir ki, rekord temperatur artımının əsas səbəbi istixana qazı emissiyalarının artmasıdır. Eyni zamanda, planetin temperaturunu soyudan La Nina hadisəsinin El Nino-ya çevrilməsi də bu yüksəlişi sürətləndirib. Günəş dövrəsindəki dəyişikliklər, böyük vulkan püskürmələri və soyuducu aerozolların azalması da temperatur artımına təsir göstərmiş ola bilər.

Təşkilat iqlim dəyişikliyi ilə mübarizədə hava, su və iqlim xidmətlərinə sərmayə qoyulmasının daha da vacib olduğunu vurğulayıb.

Qeyd edək ki, El Nino fenomeni, Sakit Okeanın ekvatorial bölgəsində dəniz suyunun anormal dərəcədə istiləşməsi ilə xarakterizə olunur. La Nina isə El Nino-nun əksidir, yəni Sakit Okean ərazisində dəniz suyunun anormal dərəcədə soyumasıdır.

Fidan Hacızadə