Təyyarə son anda ağır qəzadan qurtuldu
Yaponiyada təyyarə son anda ağır qəzadan yayınıb.
Sfera.az bildirir ki, hadisə Tokioda yerləşən Haneda hava limanında baş verib. Belə ki, Yaponiya Hava Yollarına (JAL) məxsus JL182 reys nömrəli Boeing 737-800 tipli təyyarənin eniş zamanı sol təkərlərindən biri partlayıb. Buna baxmayaraq, saat 09:25 radələrində təyyarə təhlükəsiz eniş edib.
Hadisə zamanı göyərtədə olan 65 sərnişin və ekipaj üzvü arasında ölən və yaralanan olmayıb. Bildirilib ki, təkər dəyişdirildikdən sonra təyyarə yola çıxıb və perrona yaxınlaşıb.
Yaponiyanın Nəqliyyat və Turizm Nazirliyi uçuş-enmə zolağının təxminən 25 dəqiqə hava hərəkətinə bağlı qalması səbəbindən 15 reysin təxirə salındığını açıqlayıb. Bu gün eyni təyyarə ilə həyata keçirilməsi gözlənilən 2 reysin ləğv edildiyi bildirilib. Qəzanın səbəblərini müəyyən etmək üçün araşdırmalara başlanılıb.
Günay
