Gürcüstanın keçmiş baş naziri, “Gürcü Arzusu - Demokratik Gürcüstan” partiyasının yaradıcısı Bidzina İvanişvili ABŞ-nin sanksiya siyahısına düşüb.

Sfera.az xəbər verir ki, bu barədə ABŞ Maliyyə Nazirliyi məlumat yayıb.

ABŞ dövlət katibi Antoni Blinken bildirib ki, “Gürcü arzusu” partiyasının təsisçisi Rusiyanın xeyrinə iddia edilən hərəkətlərə görə ABŞ sanksiyalarına məruz qalıb. ABŞ Maliyyə Nazirliyi və Dövlət Departamentinin bəyanatlarından belə çıxır ki, Rusiya Federasiyasının maraqları naminə Gürcüstanın demokratik və Avroatlantik gələcəyinə zərbə vurduğuna görə İvanişviliyə qarşı sanksiyalar tətbiq edilir.

Xatırladaq ki, bir müddət əvvəl ABŞ Dövlət Departamentinin sözçüsü Metyu Miller ABŞ-nin yaxın vaxtlarda Gürcüstana qarşı yeni məhdudiyyətlər tətbiq etmək niyyətini açıqlamışdı. Miller yeni sanksiyaların səbəbi kimi ABŞ-nin Gürcüstandakı demokratiyanın vəziyyəti ilə bağlı narahatlığını göstərib.

Xatırladaq ki, oktyabrın 26-da Gürcüstanda parlament seçkiləri keçirilib. Mərkəzi Seçki Komissiyasının məlumatına görə, Rusiya ilə əlaqələri qoruyub saxlamaq və Rusiyaya qarşı sanksiyalara qarşı çıxış edən hakim “Gürcü arzusu” partiyası seçicilərin 53,93 faizinin dəstəyini qazanıb.

Noyabrın 28-də müxalifətin təşəbbüsü ilə yeni etiraz dalğası başlayıb. Buna səbəb baş nazir İrakli Kobaxidzenin ölkənin Avropa İttifaqına daxil olması ilə bağlı danışıqlara başlamaq məsələsinin 2028-ci ilə qədər təxirə salınacağı ilə bağlı bəyanatı olub. Etirazçılar fişəng, daş və butulka kimi müxtəlif əşyalardan istifadə ediblər. Hüquq-mühafizə orqanlarının əməkdaşları cavab olaraq xüsusi texnika, o cümlədən su şırnaqlarından istifadə ediblər.

İnci

İvanişvili ABŞ sanksiyasına məruz qalıb