"Bu, Ukraynanın əlini gücləndirəcək" - Janet Yellen

ABŞ Rusiyanın neft gəlirlərini azaltmaq üçün səylərini davam etdirəcək.

Sfera.az xəbər verir ki, bunu ABŞ maliyyə naziri Janet Yellen deyib.

"Burada bir sıra imkanlar var. Biz sanksiyaları nəzərdən keçirmirik, lakin həmişə neft gəlirlərinə baxırıq. Əgər biz Rusiyanın neft gəlirlərini daha da zəiflətmək yollarını tapa bilsək, bu, Ukraynanın əlini gücləndirəcək”, - o bildirib.

Yellen əlavə edib ki, Vaşinqton və müttəfiqləri də Rusiya neftinin qiymətinin aşağı salınmasını nəzərdən keçirə bilərlər.

Qeyd edək ki, 5 dekabr 2022-ci ildə Aİ-nin Rusiyadan dəniz yolu ilə neft tədarükünə tətbiq etdiyi embarqo qüvvəyə minib. G7 ölkələri, Avropa Birliyi və Avstraliya özlərinə bağlı gəmilər və ərazilər üçün Rusiya dəniz neftinin barelinə 60 ABŞ dolları qiymət həddi tətbiq ediblər. 2023-cü il fevralın 5-dən Rusiyadan gələn neft məhsullarına da analoji məhdudiyyətlər tətbiq edilib, maksimum qiymət məhsul kateqoriyasından asılı olaraq bir barel üçün 100 və 45 ABŞ dolları müəyyən edilib.

Firuzə Əliyeva