ABŞ Gürcüstana sanksiyalar TƏTBİQ EDƏCƏK - SƏBƏB
Gürcüstan hakimiyyəti ölkənin Avropa İttifaqına daxil olması ilə bağlı danışıqların dayandırılmasına etiraz edənləri təqib etdiyinə görə ABŞ Tbilisiyə qarşı sanksiyalar tətbiq etməyə hazırdır.
Sfera.az xəbər verir ki, bunu ABŞ dövlət katibi Antoni Blinken bildirib.
“Birləşmiş Ştatlar Gürcüstan xalqı və onun demokratik istəkləri ilə həmrəydir. Gürcüstanda demokratik proseslərə və ya institutlara xələl gətirənlər, o cümlədən Gürcüstan vətəndaşlarının dinc toplaşmaq və ifadə azadlığı hüquqlarını boğanlar məsuliyyətə cəlb olunacaqlar. İkitərəfli əməkdaşlığın daha əvvəl elan edilmiş hərtərəfli nəzərdən keçirilməsi ilə yanaşı, Birləşmiş Ştatlar əlavə sanksiyalar da daxil olmaqla, bizim ixtiyarımızda olan bütün vasitələrdən istifadə etməyə hazırlaşır”, - Blinken bildirib.
ABŞ dövlət katibi bildirib ki, Vaşinqton Gürcüstan vətəndaşlarına, nümayişçilərə, media nümayəndələrinə və müxalifət nümayəndələrinə qarşı qəddar və əsassız zorakılığa görə “Gürcü Arzusu” partiyasını qətiyyətlə pisləyir. ABŞ “Gürcü Arzusu”nu əsassız həbslər və fiziki zorakılıq da daxil olmaqla repressiv taktikaları dayandırmağa çağırıb. Vaşinqton həmçinin etirazlarda saxlanılanların hamısının azad edilməsini və qanunsuz güc tətbiqinə görə məsuliyyət daşıyanların mühakimə olunmasını tələb edib.
Firuzə Əliyeva
