Tanzaniyada torpaq sürüşməsi və sel 47 nəfərin həyatına son qoyub. 47 nəfər ölüb, 85 nəfər yaralanıb. Ölkənin şimalındakı Kateşdə güclü yağışların daşqınlara səbəb olması ölənlərin sayını artıra bilər.
 

Sfera.az bildirir ki, Tanzaniyada quraqlıqdan sonra başlayan yağışlar daşqınlara və torpaq sürüşməsinə səbəb olub. Səlahiyyətlilər zaman keçdikcə qurbanların sayının artacağını bildirir.

Ötən gün səhər saatlarında ölkənin 13 min nəfər əhalisi olan şəhərdə sürüşmə baş verib.
 

Sel sakinlərin evlərini aparıb, yolu dağıdıb.
 

Ərazidə bir çox yollar palçıq, ağac və qayalarla bağlanıb. Çoxlu mal-qaranın tələf olduğu bildirilir.


Tanzaniya Prezidenti Samiya Suluhu-Həssan dekabrın 12-dək Dubayda keçirilən BMT-nin iqlim dəyişikliyi ilə bağlı COP28 konfransı zamanı həlak olanların və yaralananların ailələrinə başsağlığı verib. O, insanları xilas etmək üçün hökumətə əlavə səylərin həyata keçirilməsini əmr edib.
 

Qeyd edək ki, görünməmiş quraqlıqdan sonra Şərqi Afrika indi güclü yağışlar və daşqınlardan əziyyət çəkir. Somalidə leysan 1 milyondan çox insanı evsiz qoyub, yüzlərlə insan həyatını itirib.
 

2023-cü ilin may ayında Ruandada güclü yağışlar dağıdıcı daşqınlara və torpaq sürüşməsinə səbəb olmuş, ən azı 130 nəfər həlak olmuşdur.


Alimlər iqlimin pisləşməsinin daha sıx və tez-tez ekstremal hava hadisələrinə səbəb olduğunu deyir. Buna cavab olaraq, Afrika liderləri iqlim böhranı ilə bağlı fəaliyyətin maliyyələşdirilməsinə kömək etmək üçün yeni qlobal vergilər və beynəlxalq maliyyə institutlarında dəyişikliklərə təkan verirlər.
 

Bu arada Dubayda keçirilən iqlim sammitində nüvə enerjisi ilə bağlı bəyannamə qəbul edilib.

Aynil
Sfera.az