Son dövrlərdə İran ilə Qərb dünyası arasında cərəyan edən gərgin münasibətlər fonunda, müxtəlif dövlətlərin İran İslam İnqilabı Keşikçiləri Korpusunu (SEPAH) rəsmən terror təşkilatı kimi tanıması prosesi sürətlə genişlənir. Son rəsmi məlumatlara əsasən, Dominikan Respublikası da bu siyahıya qoşularaq SEPAH-ı terror strukturu kimi qəbul edib.

Sfera.az xatırladır ki, indiyə qədər ABŞ, Kanada, Bəhreyn, Avropa İttifaqı və bir sıra digər nüfuzlu beynəlxalq subyektlər SEPAH-a qarşı ən sərt sanksiyalar tətbiq edib və bu qurumu birbaşa qlobal terror fəaliyyətləri ilə əlaqələndirirlər.

Görəsən, SEPAH-ı terror təşkilatı kimi tanıyan ölkələrin coğrafiyasının bu cür genişlənməsi gələcəkdə rəsmi Tehran üçün hansı strateji və iqtisadi nəticələri doğura bilər?

Mövzu ilə bağlı Sfera.az-a açıqlama verən siyasi analitik Kənan Novruzov bildirib ki, son illər ərzində SEPAH üzərindəki beynəlxalq təzyiq mexanizmlərinin artması tamamilə başadüşülən və qanunauyğun bir prosesdir:

“Xüsusilə Qərb və aparıcı Avropa dövlətlərində bu siyasi-hərbi təzyiqlərin daha da kəskinləşəcəyi gözlənilir. Hesab edirəm ki, bu proses həm də son dövrlərdə SEPAH-ın İranın daxili siyasi mühitində öz dominantlığını və nüfuz dairəsini artırmaq cəhdləri ilə birbaşa bağlıdır. Çünki Qərb dairələri SEPAH-ın ölkə daxilindəki idarəetmə və qərarvermə mexanizmlərinə strateji təsir imkanlarını genişləndirməsini qətiyyən istəmir”.

Bununla belə, politoloq xüsusi olaraq qeyd edib ki, SEPAH zəif bir institut deyil. Onun qənaətinə görə, bu hərbi quruma qarşı yönələn xarici təzyiqlərin qısa zaman kəsiyində dərhal həlledici və sarsıdıcı bir nəticə verəcəyini gözləmək real deyil.

Qeyd edək ki, SEPAH hazırda İran İslam Respublikasının ən qüdrətli hərbi, siyasi və iqtisadi strukturlarından biri hesab olunur. Eyni zamanda bu təşkilat regional müstəvidə fəaliyyət göstərən bir sıra qanunsuz silahlı qruplaşmalarla yaxın koordinasiyada və onlara hərbi-logistik dəstək verməkdə mütəmadi olaraq ittiham edilir.

Firuzə Əliyeva
Sfera.az

SEPAH niyə terror təşkilatı kimi tanınır? : "Qərb istəmir ki, ..."