Sfera.az bildirir ki, millət vəkili Xalq artisti Flora Kərimovanın "artıq Şuşanın azad olunmasından sonra müxalifətçiliyin dozasını bir az aşağı salmaq və Qarabağ məsələsində iqtidara dəstək vermək lazımdır" təxmini fikirlərinə diqqət çəkərək, onun yanaşmasının doğru olduğunu deyib:

"İqtidara dəstəyi kimə qarşı verirsən? Əlbəttə, erməniyə qarşı. İstəmirsiniz erməniyə qarşı iqtidar bundan sonra da uğur qazansın? Bir qrup axmaq var ki, öz dəyişməzliyini əqidə deyə tələffüz edir. Demək ki, bu iqtidarın iradəsi ilə Azərbaycanın suverenliyi Xankəndində də bərpa olunsa, yenə də deyəcəklər ki, niyə Xankəndinə antidemokratik yolla girmisiniz?  Adam tanıyıram  bağırırdı ki, kim Şuşanı qaytarsa, gedib ayağından öpəcəm. İndi az qalır ayağını gözə soxsun ki, bəs Xankəndini ermənidə saxlamaq xəyanətdir. 

İndiyədək böyük sənətçi Flora Kərimovanın cəsarətlə söylədiklərinin bir cümləsini qorxudan deyə bilməyənlər, başlayıb ondan cəsarət tələb edirlər. Sənət adamı doğru mövqe ifadə edib, işğal olunmuş ərziləri azad etmiş iqtidarı bu işi sona çatdırmaq üçün dəstəkləmək lazımdır. Biz bu gün cəmiyyətimizin bəlası olun korrupsiyanı da, ədalətsizliyi də, inhisarçılığı da, haqsız rəqabəti də öz imkanlarımızla ortadan qaldıra bilərdik, ancaq Şuşaya yenidən qayıdışı gerçəkləşdirmək bir möcüzə idi, tarixi şansı bir anı doğru seçərək dəyərləndirmək lazım gəlirdi. Məhz o anda çevik davranışımızla bu möcüzəni gerçəkləşdirdik. Açılacaq, Zəngəzur da, Turan yolu da. Xankəndində də dalğalanacaq bayrağımız. Ağıllanacaqsınızmı? Bax, bu möcüzəyə inana bilmirəm”.

F.Mustafa həmçinin Elçibəyin oğlunun toyu ilə bağlı məsələyə də toxunub:

"Elçibəyin oğlu bir dövlət məmurudur, siyasətlə məşğul deyil və atasının silahdaşları ilə elə bir təması yoxdur. Öz işlədiyi qurumun rəhbərliyini, iş yoldaşlarını, bir də qohum-dostlarını toyuna çağırır. Pandemiyada say məhdudiyyətini də nəzərə alıb. Başqa nə etməlidir? Axmaq sürüsü bir gənci topa tutub ki, bəs cəbhəçiləri, partiya sədrlərini niyə toya çağırmamısan? Buna görə adamı birbaşa xəyanətdə ittiham edirlər. İnsan azadlığı, iradə azadlığı deyilən heç nə beyinlərinə girmir. Qardaş, Allah xoşbəxt etsin demək nə qədər çətindir? Əxlaqlı davranış bu olmazdımı? 

Bir siyasətçimiz də ABŞ səfirinin erməniləri dəstəkləyən davranışna görə iqtidarı günahlandırır ki, bütün bunlar məhz bu iqtidarın ABŞ-la münasibətləri düzgün qurmadığından qaynaqlanır. Nə düzgün qurmamaq, həmin ABŞ başını ATƏT-in Minsk qrupundan bayıra çıxarıb deyir ki, Qarabağdan çıxın və ermənilərin dövlət qurmasına imkan verin, indi deyirsən razılaşıb münasibəti düzgün quraq?  Dəyişməyən soydaşlarım, 2020-ci ilin Moskva vaxtı ilə 9 noyabr, Bakı vaxtı ilə 10 noyabr tarixindən yeni bir tarix başlayıb. Söz də, fikir də, müxalifətçilik də, orta məktəbdə tədris metodikası da, dövlətə münasibət də, qalib gəlmiş iqtidarla davranış qaydaları da, bir sözlə çox şeylər kökündən dəyişməlidir, yeniləşməlidir”.