Yay mövsümündə sərinlədici təsirə malik olan və xüsusilə uşaqların, eləcə də böyüklərin sevimli qidasına çevrilən dondurma məhsulları əhali arasında geniş istehlak olunur. Temperaturun yüksəldiyi aylarda bu cür məhsullara olan tələbatın artması ilə paralel olaraq onların keyfiyyəti və təhlükəsizliyi də xüsusi önəm kəsb edir.

Çünki düzgün istehsal olunmayan və sanitar-gigiyenik normalara cavab verməyən dondurmalar zəhərlənmə və digər sağlamlıq problemlərinə səbəb ola bilər. Bu baxımdan ölkədə istehlakçılara təqdim olunan dondurma məhsullarının təhlükəsizlik standartlarına uyğun olub-olmadığının yoxlanılması mühüm məsələdir.

Bəs ölkədəki dondurmalar nə qədər keyfiyyətlidir?

Mövzu ilə bağlı Azərbayan Qida Təhlükəsizliyi Agentliyi (AQTA) tərəfindən Sfera.az-a verilən məlumata görə, məhz bu məqsədlə AQTA tərəfindən hər il olduğu kimi, cari ildə də dondurma məhsullarının monitorinqi həyata keçirilib.

Bildirilib ki, monitorinq çərçivəsində həm pərakəndə, həm də topdansatış obyektlərində satışa çıxarılan yerli istehsallı dondurmalardan nümunələr götürülərək müvafiq laboratoriyalarda sınaqdan keçirilib. Ümumilikdə 50 nümunə götürülərək müayinə üçün müvafiq laboratoriyalara təqdim edilib.

Sınaq nəticələrinə əsasən, nümunələrdə təhlükəsizlik göstəriciləri üzrə hər hansı uyğunsuzluq aşkarlanmayıb.

Qeyd edilib ki, xaricdən gətirilən dondurma məhsulları isə ölkənin gömrük ərazisinə daxil olarkən riskəsaslı nəzarətə cəlb olunur. Yalnız sınaq nəticələri uyğun çıxan məhsulların dövriyyəsinə icazə verilir.

Firuzə Əliyeva
Sfera.az

Marketlərdəki dondurmalar keyfiyyətlidir? - AQTA-dan CAVAB