Taksi sürücüləri SİMA ilə təsdiqlənəcək!

Taksilərdə ən çox rast gəlinən problemlərdən biri tətbiqdə göstərilən avtomobil və sürücüdən fərqli birinin sifarişə gəlməsi idi.
Bu, xüsusilə uşaqlarını taksi ilə göndərən valideynlər üçün ciddi narahatlıq yaradır, həmçinin sifariş məlumatlarının dəqiq olmaması sərnişinlərdə çaşqınlıq doğururdu.
Artıq bu problemə texnoloji həll tapılıb. Azərbaycan Yerüstü Nəqliyyat Agentliyi “Sima” vasitəsilə bu məsələni aradan qaldırmağa hazırlaşır.
Sfera.az bildirirki, məsələ ilə bağlı nəqliyyat üzrə ekspert Eldəniz Cəfərov Musavat.com-a bildirib ki, “Sima” rəqəmsal identifikasiya tətbiqi sürücülərin şəxsiyyətini təsdiqləmək üçün istifadə olunacaq:
“Sürücüyə tətbiq vasitəsilə sorğu göndəriləcək və o, “Sima” proqramına daxil olaraq özünü identifikasiya edəcək. Üz tanıma sistemi ilə həyata keçirilən bu proses nəticəsində artıq başqa bir şəxs fərqli sürücünün məlumatları ilə taksi fəaliyyəti göstərə bilməyəcək. Bu, həm sərnişinlərin təhlükəsizliyi, həm də xidmət keyfiyyətinin artırılması baxımından çox vacib addımdır.”
Ekspert əlavə edib ki, bu yenilik maşınların bir-bir saxlanılıb sürücülərin yoxlanılması ehtiyacını da aradan qaldıracaq. Yeni texnologiya daha effektiv və müasir yanaşmadır.
Bundan başqa, sistem peşəkar və təcrübəli taksi sürücülərinin fəaliyyətinə də dəstək olacaq. Çünki taksidən qeyri-peşəkar məqsədlərlə istifadə edib narahatlıq yaradan şəxslər bu xidmətdən kənar qalacaq və nəticədə peşəkar sürücülər üçün daha sağlam iş şəraiti formalaşacaq.