7 iyul tarixi dünyanın dörd bir tərəfində şirin bir səbəblə — Ümumdünya Şokolad Günü kimi qeyd olunur. Bu gün 1550-ci ildə Avropada ilk dəfə şokoladın tanıdılması ilə əlaqələndirilir. Tarixdəki bu dadlı hadisə bəşəriyyətin ən sevilən ləzzətlərindən birinin həyatımıza daxil olmasının başlanğıcı olub.

Sfera.az xəbər verir ki, şokoladın tarixi qədim Mayya və Azteklərə qədər gedib çıxır. Onlar şokoladı "tanrıların qidası" adlandırır və əsasən içki şəklində istifadə edirdilər. Zamanla Avropaya yayılan şokolad, xüsusən 19-cu əsrdən etibarən sənaye üsulları ilə istehsal olunmağa başladı və bütün dünyada geniş yayılaraq çoxmilyardlıq bir sənayeyə çevrildi.

Hazırda dünya üzrə illik şokolad istehsalı 8 milyon tona çatır. Təkcə 2024-cü ildə qlobal şokolad sənayesinin ümumi dəyəri 137 milyard dollar olaraq qeydə alınıb. Mütəxəssislər bu bazarın 2030-cu ilə qədər 200 milyard dollardan çox olacağını proqnozlaşdırır. Şokolad istehlakına görə İsveçrə birincidir. Bu ölkədə bir nəfər orta hesabla ildə 11 kiloqramdan çox şokolad yeyir. Şokolad istehsalında isə Belçika və İsveçrə kimi ölkələr Avropada liderlik edir. Kakaonun əsas istehsalçısı isə Qərbi Afrika ölkələridir – Fil Dişi Sahili və Qana dünyanın kakaosunun təxminən 60 faizini təmin edir.

Azərbaycanda da şokolad məhsullarına maraq ildən-ilə artır. Dövlət Statistika Komitəsinin son məlumatlarına əsasən, ölkədə şokoladın həm idxalı, həm də yerli istehsalı artmaqdadır. Alıcıların seçimində daha çox südlü və tünd şokolad önə çıxır.

Tibb sahəsində aparılan tədqiqatlar da şokoladın bir çox müsbət təsirini üzə çıxarıb. Tünd (bitter) şokoladın tərkibindəki flavonoidlər ürək-damar sisteminə faydalı təsir göstərir, qandakı təzyiqi tənzimləyir və immun sistemini gücləndirir. Eyni zamanda, serotonin və endorfin hormonlarını artıraraq əhval-ruhiyyəni yüksəldir, stresin azalmasına səbəb olur. Təbii ki, bu faydaları əldə etmək üçün şokoladın miqdarına nəzarət edilməli, daha çox tünd və şəkəri az olan növlərə üstünlük verilməlidir.

Şokoladınız bol, ovqatınız şirin olsun!

Firuzə Əliyeva
Sfera.az

Ümumdünya Şokolad Günüdür