Son illərdə sosial media təsiri ilə insanların bir-birinə bənzəmək istəyi getdikcə güclənir. Xarici görünüşdən davranış tərzinə qədər eyni şablonlara uyğunlaşmaq bir növ “ideal obraz” yaratmaq cəhdinə çevrilib. Bu meyl fərdiliyin arxa plana keçməsinə və şəxsi gözəlliyin itirilməsinə səbəb olur.

İnsanlar niyə bənzər görünmək istəyir? Bu standartlara uyğunlaşmayan insanlar cəmiyyətdə özlərini necə hiss edirlər?

Mövcud suallarla bağlı Sfera.az-a açıqlama verən sosioloq Lalə Mehralı bu vəziyyətin kökünün süni gözəllik standartlarının yaradılmasında dayandığını deyib.
Onun sözlərinə görə, normal görünüşü anormal göstərib, qeyri-təbii dəyişiklikləri isə adi hala çevirərək elə bir mühit formalaşdırdılar ki, indi dünyada insanlar təbii üz cizgilərinə və doğuşdan gələn gözəllik xüsusiyyətlərinə malik olanları qəribə və fərqli hesab edirlər:

“Halbuki əvvəllər hər qızın özünəməxsus gözəl siması vardı. Birinin yanağındakı qəmzə, digərinin qönçə kimi dodaqları, başqasının kaman qaşları, birinin yumru üzü, digərinin isə sivri çənəsi onun fərqli gözəllik nişanəsi idi. Bizi bir-birimizdən ayıran, yadda saxlanılan əsas cəhət də məhz bu idi. Hansısa bir qız və ya qadın haqqında danışarkən, dərhal onun üzündəki bu xüsusi cizgilər göz önünə gəlirdi. Tarixən də poeziyada, şeirlərdə, təcnislərdə və qoşmalarda şairlər öz qəhrəmanlarını məhz belə spesifik gözəllikləri ilə təsvir ediblər”.

Sosioloq indi vəziyyət tam fərqli olduğunu bildirirək qeyd edib ki, hər on qızdan səkkizi bir-birinin eynisidir:

“Əksəriyyətində eyni burun, oxşar dodaq forması, itiləşdirilmiş çənə və gicgahlara qədər dartılmış gözlər var. Elə bir standart yaradılıb ki, gözəllik anlayışı tamamilə şablonlaşaraq insanları bir-birinə oxşatmağa başlayıb. Artıq o xüsusi, təbii gözəllik daşıyan qızlar barmaqla sayılacaq qədər az qalıb. Təəssüf ki, indi elə bir dövrdəyik ki, estetik müdaxilələrə maraq yaşı 16-17-yə qədər enib. Əgər bu qədər gənc qız süni üsullarla gözəllik axtarışına çıxırsa, burada ciddi təhlükənin olduğunu dərk etməliyik”.

L.Mehralı vurğulayıb ki, daha da acısı, təbii gözəlliyi olan qızlara da bu standartları təlqin etməyə çalışırlar:

“Məsələn, bir qızın dodaqları incədirsə, ətrafındakılar ona israrla dodaqlarını dolğuyla böyütməyi məsləhət görür, durmadan dodaqlarının kiçik olduğunu deyərək onu kompleksə salırlar. Başqa bir qızın yumru çənəsi varsa, mütləq şəkildə ona çənəsini sivriləşdirməyi tövsiyə edirlər, ta ki həmin qız öz çənəsindən utanana qədər. İradəsi möhkəm, öz fərqliliyini sevən insanlar bu tələyə düşmür. Lakin kimlər ki zəif iradəlidir, yaxud ətrafın fikrini həddindən artıq önəm verir, belə qızlar tezliklə bu cərəyanın təsirinə düşür və süni gözəllik bazarının potensial müştərisinə çevrilir”.

Fidan Hacızadə
Sfera.az

"Təbii gözəlliyi olan qızlara təsir edirlər"