Süni intellektin artan enerji sərfiyyatı ilə bağlı narahatlıqlar gündəmə gəlib. Yeni araşdırmalar bir “ChatGPT” sorğusunun enerji sərfiyyatının istifadə edilən modelə və sorğunun mürəkkəbliyinə görə 50 dəfəyə qədər dəyişə bildiyini üzə çıxarıb.

Sfera.az xarici mediaya istinadən xəbər verir ki, “OpenAI” şirkətinin baş direktoru Sam Altman, bu barədə verdiyi açıqlamada “Orta hesabla bir “ChatGPT” sorğusu, bir sobanın bir saniyədə sərf etdiyi enerjiyə bərabərdir”,- deyib.

Bu açıqlama süni intellekt texnologiyalarının ətraf mühitə təsiri ilə bağlı müzakirələri yenidən alovlandırıb. Lakin ekspertlər bildirir ki, bu sahədə “orta” göstəricilər yanıldıcı ola bilər. Böyük dil modellərinin (LLM) yüksək enerji sərfiyyatının əsas səbəbi onların sahib olduqları nəhəng parametr sayı ilə bağlıdır. Məsələn, “GPT-4” modelinin bir trilyondan artıq parametrə malik olduğu ehtimal edilir.

Bu modellər dünya üzrə yerləşən iri server mərkəzlərində, minlərlə yüksək gücə malik GPU ilə fəaliyyət göstərir. 2024-cü ilin iyununda aparılan və 14 fərqli açıq mənbəli süni intellekt modelini əhatə edən araşdırmada bəzi modellərin digərlərindən 50 dəfə artıq enerji sərf etdiyi və karbon emissiyası yaratdığı məlum olub.
Xüsusilə məntiqi analiz və düşünmə tələb edən tapşırıqlar üçün nəzərdə tutulan modellər, sadə sorğulara cavab verən modellərlə müqayisədə daha çox enerji sərf edir.

İstifadəçilər nə etməlidir?

Ekspertlərə görə, süni intellektin ətraf mühitə təsirini azaltmaq üçün istifadəçilərin də bəzi addımlar atması vacibdir:

“Sadə sorğular üçün ağır modellərdən istifadə etməmək, sorğular zamanı “zəhmət olmasa”, “təşəkkür edirəm” kimi əlavə sözlərdən çəkinmək lazımdır. Çünki bu cür sözlər belə sistemin emal gücünü artıraraq enerji sərfiyyatını yüksəldə bilər”.

Mütəxəssislər bildirirlər ki, düzgün model seçimi və məqsədəuyğun istifadə süni intellektin daha davamlı və ekoloji cəhətdən zərərsiz istifadəsi üçün mühüm rol oynaya bilər.

Bəsti Rəfizadə
Sfera.az

“ChatGPT” enerji sərfiyyatını dəyişir - RƏQƏMLƏR