“Wi-Fi” dönəmi bitir? -“Li-Fi” yoldadır...

Cənubi Koreyada alimlər işıqla məlumat ötürən yeni nəsil “Li-Fi” texnologiyası üzərində mühüm irəliləyiş əldə ediblər. “Li-Fi” (Light Fidelity) – məlumatların LED işıq vasitəsilə ötürüldüyü simsiz rabitə texnologiyasıdır və ənənəvi “Wi-Fi”-dan 100 dəfə daha sürətli ola bilər.

Sfera.az xarici mediaya istinadən xəbər verir ki, Koreya Yüksək Elm və Texnologiya İnstitutu (KAIST) ilə Koreya Standartlar və Elmi Tədqiqatlar İnstitutunun tədqiqatçıları, eyni anda həm məlumat ötürən, həm də onu real vaxtda şifrələyə bilən bir “Li-Fi” cihazı hazırlayıblar. Bu yenilik artıq əlavə şifrələmə cihazlarına ehtiyacı aradan qaldırır.

“Li-Fi” texnologiyası yalnız işığın çatdığı ərazidə fəaliyyət göstərdiyindən, məlumat ötürülməsi daha məhdud, lakin daha təhlükəsiz mühitdə baş verir. Bu da onu “Wi-Fi”-dan fərqli olaraq kiber hücumlara qarşı daha dayanıqlı edir.

Mütəxəssislər “Li-Fi”-nin gələcəkdə “Wi-Fi”-nin yerini tuta biləcəyini bildirirlər.

Bəsti Rəfizadə
Sfera.az