Alimentlə bağlı YENİLİK – Dövlət hesabına ödənilə bilər

Aliment məsələsi günümüzün ən çox müzakirə olunan mövzularındandır. Çünki boşanmalar çoxaldıqca aliment məsələsi də problemə çevrilir. Bir çox valideynlər müəyyən səbəblərdən aliment ödəyə bilmir.

Problemin həlli üçün müxtəlif variantlar təklif edilir.

Son günlər sosial şəbəkələrdə müzakirələr aparılır ki, “uşaq pulu”nun verilməsi bəzi imkansız valideynləri aliment yükündən azad edə bilər.

Bu nə dərəcədə realdır?

Nəzərə alaq ki, “uşaq pulu” dövlət tərəfindən uşağın sosial rifahını dəstəkləmək məqsədilə verilən bir müavinət növüdür. Alimentsə uşağın saxlanılması üçün valideynin şəxsi və hüquqi öhdəliyidir. Bu öhdəlik adətən məhkəmə qərarı ilə təyin olunur.

Ölkəmizdə olduğu kimi, beynəlxalq təcrübədə də müxtəlif ölkələrin qanunvericiliyində bu iki ödəniş növü bir-birindən tam müstəqildir. Məsələn Almaniyada həm aliment, həm də uşaq pulu mövcuddur. Uşaq pulu alimentin əvəzi hesab edilmir. Lakin bəzi hallarda alimentin hesablanmasında nəzərə alına bilər.

Fransada hər iki ödəniş ayrı-ayrılıqda həyata keçirilir və biri digərini əvəz etmir. Böyük Britaniya və Kanadada da eyni yanaşma tətbiq olunur – uşaq pulu dövlət tərəfindən verilir, aliment isə şəxsi məsuliyyət kimi saxlanılır.

Beynəlxalq təcrübələr göstərir ki, uşaq pulu şəxsi aliment öhdəliyini aradan qaldırmır. Yəni uşaq pulu mövcud olsa belə, şəxslərin aliment ödəmə öhdəlikləri mövcud olaraq qalır.

Çözüm nədir?

Mövzu ilə bağlı Bizim.Media-ya danışan Vəkillər Kollegiyasının üzvü Dədəkişi Vəlizadə deyir ki, məsələdə optimal çıxış yolu tapmaq olar:

“Problemin daha səmərəli həlli kimi Skandinaviya ölkələrinin təcrübəsinə diqqət etmək olar. Norveç, İsveç və Finlandiya kimi ölkələrdə qanunvericilikdə nəzərdə tutulmuş hallarda dövlət alimenti öncədən ödəyir, daha sonra isə bu məbləği aliment ödəməli olan valideyndən geri tələb edir.

Bu sistem həm uşağın rifahını təmin edir, həm də alimentin gecikməsi və ya ümumiyyətlə ödənilməməsi problemini aradan qaldırır. Təbii ki, irəli sürülən bu yanaşma problemi tam şəkildə həll etməyə bilər. Bu baxımdan hesab edirəm ki, fərqli baxışların dinlənməsi və müzakirəsi məsələnin daha optimal həllinə töhfə verə bilər”.

Xatırladaq ki, Azərbaycanda İnsan Hüquqları üzrə Müvəkkil tərəfindən Aliment Fondunun yaradılması təklif olunub. Sözügedən məsələ uzun müddətdir ki, müzakirə edilir.