1 iyul sosial şəbəkələrdə və ictimaiyyət arasında “Bakılılar Günü” kimi qeyri-rəsmi bayram olaraq qeyd olunur. Rəsmi dövlət təqvimində yer almasa da, bu gün Bakı ruhunu daşıyan hər bir insan üçün mənəvi bir tarixə çevrilib.

Sfera.az xəbər verir ki, hazırda Bakı əhalisinin sayı 2.5 milyondan çoxdur, və bu rəqəm təkcə statistik göstərici deyil, hər biri özünəməxsus həyat hekayəsinə malik insanların toplamıdır. Bu şəhər müxtəlif dövrlərin, xalqların, dillərin və dinlərin görüş yeri, bir növ kültürlərarası körpüdür. İnsanlar özlərini “bakılı” adlandırmaqla təkcə yaşadıqları yeri deyil, həm də daxili mədəniyyət və həyat tərzini ifadə edirlər.

Bakılı olmaq nədir?

Bakılı olmaq – şəhər ləhcəsi ilə danışmaq, zarafatla söhbətə başlamaq, könlü açıq olmaqdır. Bu anlayış coğrafiyadan daha çox mədəniyyət və xasiyyət mənsubiyyətidir. Paytaxtda doğulub-böyümüş insanlar üçün bu gün bir növ şəhərə minnətdarlıq günüdür, onları formalaşdıran, şəxsiyyətlərinə yön verən Bakı üçün. Sosioloqlar və şəhərşünaslar qeyd edirlər ki, bu tip qeyri-rəsmi bayramlar şəhər vətəndaşları arasında lokal kimlik duyğusunu gücləndirir, mədəni irsi qoruyur və sosial bağlılığı artırır.

“Bakılılar Günü” də məhz bu funksiyanı daşıyır – Bakıya olan emosional bağlılığı gündəmə gətirmək, onu yenidən xatırlamaq və paylaşmaq. Bir çoxları bu günü şəhərə aid hisslərini ifadə etmək, uşaqlıq xatirələrinə qayıtmaq və bakılı olmağın mənəvi anlamını paylaşmaq üçün fürsət kimi dəyərləndirir.

Qeyd edək ki, Azərbaycanın paytaxtı və ən böyük şəhəri olan Bakı, Xəzər dənizinin qərb sahilində, Abşeron yarımadasında yerləşir. Tarixi min illərlə ölçülən bu şəhər, həm Şərqin, həm də Qərbin mədəniyyətini özündə birləşdirən nadir məkanlardan biridir. Bakı təkcə siyasi və iqtisadi mərkəz deyil, həm də memarlıq abidələri, muzeyləri, incəsənət ocaqları və qədim İçərişəhəri ilə regionun ən önəmli şəhərlərindən biri sayılır. Bakı – küləyi sərt, insanı isti, neft qoxulu, musiqi dolu, daş divarları tarix, küçələri həyat olan bir şəhərdir.

Bəsti Rəfizadə

Sfera.az

1 iyul - Bakılılar günüdür