Əvvəllər pik saatlarda Bakı metrosuna daxil olmaq bir növ "səbr və çeviklik testi" idi — qapılar qarşısında sıxlıq, vaqonlarda nəfəs almaq çətinliyi, platformalarda isə səbirsizliklə gözləyən sərnişin kütləsi. Amma son günlər bu mənzərə dəyişib. Sərnişinlər arasında “nə yaxşı, sıxlıq azalıb” kimi fikirlər daha tez-tez eşidilir. Artıq metronun pik saatlarda belə daha rahat və axıcı şəkildə fəaliyyət göstərməsi diqqətdən yayınmır.

Bəs bu dəyişiklik necə olub?

Mövzunu araşdırmaq üçün Sfera.az “Bakı Metropoliteni” QSC-yə sorğu ünvanlayıb.

Sorğumuza cavab olaraq "Bakı Metropoliteni" QSC-nin sədr müavini Hidayət Məmmədov bildirilib ki, Bakı metropolitenində sərnişin sıxlığının aradan qaldırılması, eyni zamanda daha çox sərnişinə xidmət göstərmək məqsədilə iş günləri səhər və axşam pik saatlarda xətlərdə olan qatarların sayının artırılmasına nail olunub.

“Qatarların hərəkətinin təşkilində yeni rəqəmsal proqram təminatının tətbiqi, o cümlədən həyata keçirirlən bir sıra optimallaşma və digər texniki tədbirlər sayəsində son 16 ildə ilk dəfə pik saatlarda interval azaldılıb. Bununla əlaqədar aprel ayından aparılan sınaq tədbirləri müsbət nəticə verib və hərəkət qrafikinə müvafiq dəyişiklik edilib. Nəticədə, sıxlığın azaldılması, sərnişin rahatlığının artırılması baxımından müsbət nəticə əldə olunub ”, - qurumdan bildirilib.

Qeyd edilib ki, hazırda Bakı metropoliteni iş günlərində orta hesabla 740 minə yaxın sərnişinə xidmət göstərir. Tətbiq edilmiş yenilik, hətta gün ərzində 19 min əlavə sərnişinin daşınması imkanı yaradır. Yeniliyin tətbiqindən sonra sərnişin sayında artım müşahidə olunmasa da, sərnişin sıxlığının azalmasına müsbət təsir göstərib.

Xatırladaq ki, Bakı metrosu 2024-cü ildə ümumilikdə 229 milyon sərnişin daşıyıb. Bu, əvvəlki illə müqayisədə 4.6 faiz artım deməkdir və göstərir ki, sərnişin nəqliyyatında metroya olan tələbat gündən-günə artır.

Firuzə Əliyeva
Sfera.az

Metroda sıxlığın azalma səbəbi - RƏSMİ