Ötən il 23 kişiyə mühafizə orderi verilib - HESABAT

"2024-cü ildə qanunvericiliyə mühüm dəyişikliklər edilib".

Sfera.az xəbər verir ki, bunu Milli Məclisin bu gün keçirilən plenar iclasında Ailə, Qadın və Uşaq Problemləri üzrə Dövlət Komitəsinin sədri Bahar Muradova Gender bərabərliyinin təmin edilməsinə nəzarəti həyata keçirən icra hakimiyyəti orqanının 2024-cü ildə fəaliyyəti haqqında hesabatı təqdim edərkən deyib.

Komitə sədri bildirib ki, Ailə Məcəlləsinin nikah yaşının 1 ildən çox olmayaraq azaldılmasını nəzərdə tutan 10.2-ci maddəsi ləğv edilib: 

"Erkən evlilik və məişət zorakılığı ilə bağlı cinayət və inzibati məsuliyyəti nəzərdə tutulan subyektlərin dairəsi genişləndirilmişdir. Ümumi bioloji baba və nənəsi olan qohumlar arasında nikahın bağlanması qadağan edilmiş, qısamüddətli mühafizə orderinin müddəti artırılmış və onun verilməsi icbarı olmuşdur.  Zərərçəkmiş şəxslərə dövlət vəsaiti hesabına pulsuz hüquqi yardımın göstərilməsi qaydası təsdiq edilmiş, məişət zorakılığının qarşısının alınması üzrə monitorinq və əlaqələndirmə mexanizmi yaradılmışdır".

Bundan başqa komitə sədri qeyd edib ki, ötən il 23 kişiyə mühafizə orderi verilib.

B.Muradova bildirib ki, gender əsaslı ayrı-seçkiliyin qarşısının alınması sahəsində ixtisaslaşmış mexanizmlərin işinin yaxşılaşdırılması məqsədilə regionlarda və şəhərlərdə  çoxsaylı təlimlər ,seminarlar keçirilmiş,vətəndaş müraciətləri və şikayətləri nəzarətə götürülmüş,monitorinq və əlaqələndirmə qruplarının fəaliyyəti təhlil edilib.

Onun sözlərinə görə, bir sıra problemli məsələlərə dair 860  Dəstək Xəttinə daxil olan müraciətlərdə (9%) artım, (2024-330, 2023-cü ildə 302), Qadın Dəstək Xətt Xidmətinə daxil olan müraciətlərin sayında (1,5 dəfə) isə azalma qeydə alınıb (2024-cü ildə 1623, 2023-cü il 4079), Daxili İşlər Nazirliyinə məişət zəmnində baş verən insidentlərə dair daxil olmuş müraciətlərin, o cümlədən  cinayət hadisələrinin sayı azalıb.

Sədr onu da nəzərə çatdırıb ki, bu, ilk növbədə müdafiə mexanizmlərinin fəaliyyətinin koordinasiya edilməsi və  güclənməsindən xəbər verir.

O, həmçinin əlavə edib ki, ötən il zərər çəkmiş şəxslərə 325-i qısamüddətli (2023-cü ildə 180-i), 34-ü uzunmüddətli olmaqla (2023-cü ildə 16-sı), ümumilikdə 359 mühafizə orderi icraatda olub (2023-cü ildə 196). Onlardan 338-i qadınlara (2023-cü ildə 187-si) 21-i kişilərə verilib (2023-cü ildə 9-u).

Firuzə Əliyeva
Sfera.az