Körpə ana bətnində səsləri tanıyır - YENİ ARAŞDIRMA
Araşdırmalara əsasən, körpələr hələ ana bətnində olarkən müxtəlif stimullara reaksiya verə, öyrənə və hətta bəzi mühüm refleksləri inkişaf etdirə bilirlər.
Sfera.az Türkiyə mediasına istinadən xəbər verir ki, məsələn, hamiləliyin erkən mərhələlərində, təxminən 16-cı həftədən etibarən, körpələr səslərə reaksiya verməyə başlayırlar. Bu isə onların hələ tam inkişaf etməmiş qulaq orqanları ilə xarici dünyanı qavramağa çalışdıqlarını göstərir.
Tədqiqatlar göstərib ki, doğulduqdan dərhal sonra körpələr analarının səsinə çevrilirlər. Bu isə onların artıq ana bətnində səsə qarşı reaksiya verdiklərini və bu səsləri tanıdıqlarını göstərir. Hamiləlik dövründə ananın danışması və körpənin yerləşdiyi nahiyəyə toxunması, dölün təpiklə reaksiya verməsinə səbəb olur.
Körpələrin ana bətnində ağlayıb-ağlamadığı isə hələ də elmi mübahisə mövzusudur. Ağlamaq sadə bir refleks deyil, bir neçə sistemin - üz əzələləri, tənəffüs yolları və sinir sisteminin birgə işini tələb edir. Elmi müşahidələrə əsasən, bəzi körpələr ana bətnində ağlamağa bənzər davranışlar nümayiş etdirirlər. Bu davranışlar arasında ağzın açılması, dilin hərəkəti, nəfəs dəyişiklikləri və uzun nəfəs fasilələri qeyd edilib.
Nəticə olaraq, yeni elmi tədqiqatlar körpələrin ana bətnində passiv varlıqlar olmadığını, əksinə xarici stimullara reaksiya verə, reflekslərini inkişaf etdirə və doğuşdan əvvəl ağlama davranışları nümayiş etdirə bildiklərini ortaya qoyur. Bu isə valideynlər üçün körpə ilə ünsiyyət qurmağın hələ hamiləlik dövründə mümkün və faydalı olduğunu göstərir.
Fidan Hacızadə
Sfera.az
