Fransa, İspaniya və Yunanıstan sosial şəbəkə istifadəçiləri üçün yaş məhdudiyyətləri tətbiq etməyi planlaşdırır. Bu təşəbbüs, uşaqların rəqəmsal sağlamlığını qorumaq məqsədilə həyata keçiriləcək.

Belə bir zərurət nəyə görə lazımdır və hansı yaşa qədər məhdudiyyətin tətbiqi yaxşı olardı?

Sfera.az-a açıqlama verən sosioloq Lalə Mehralı bu qərarın çox vacib olduğunu dedi.

Onun sözlərinə görə, adıçəkilən ölkələr anlayır ki, belə vəziyyətdə nə uşaq yaşda, nə yeniyetmə, nə də gənc yaşda normal tərbiyə həyata keçirmək mümkün deyil.

L.Mehralının fikrincə, zəruri şərtlər daxilində tərbiyə almayan uşaqların quracağı gələcək narahat və etibarsız olacaq:

“Ona görə də bu vəziyyətin fərqinə vararaq sosial şəbəkələrə məhdudiyyət tətbiq etmək düzgün addımdır. Əslində, bu, çoxdan həyata keçirilməli idi. Bizim ölkədə də bu cür tədbirlərə ciddi ehtiyac var. Ümumiyyətlə, 18 yaşına qədər insanların sosial şəbəkələrdən istifadəsi qadağan olunmalıdır. Artıq 8 yaşlı qız uşaqları “TikTok”da video çəkərək paylaşır, qəribə rəqslər edir, makiyaj edir və kamera qarşısında poz verir. Valideynlərin də bəziləri 8-10 yaşlı uşaqlarını çəkib paylaşmaq üçün bir-biri ilə yarışırlar. Hər kəs öz övladını digərlərindən üstün göstərmək istəyir, onun bacarıqlarını diqqətə çatdırmağa çalışır. Bu yaxşı hissdir. Amma bu fərqliliklər təhsil uğurları, idman nailiyyətləri və ya istedad yönümlü olmalıdır. Təəssüf ki, bu gün valideynlərin bəziləri uşaqlarını makiyajlı, orientallarla dolu videolarda paylaşırlar”.

O vurğulayıb ki, bu cür hallar ciddi şəkildə nəzarətə götürülməlidir:

“Bu valideynlər övladlarının gələcəyini, şəxsi məkanını və məhrəmliyini düşünmürlər. Əgər valideyn belə davranırsa, sosial şəbəkələrin necə işlədiyini artıq dərk edən bir uşaq başqa cürmü böyüyəcək? Təbii ki, gördüyünü tətbiq edəcək və sosial şəbəkənin əsirinə çevriləcək. Səhəri açar-açmaz, gözümüzü yumamış telefona baxırıq. Sosial şəbəkədə nə baş verdiyini yoxlayır, paylaşmaq ehtiyacı hiss edirik. Elə bil insanlar paylaşmadan o günü yaşamış hesab etmirlər, sanki varlıqlarını paylaşmaqla təsdiqləyirlər. Bu, artıq bir asılılıqdır”.

Sosioloq əlavə edib ki, bu asılılıq uşaqların tərbiyəsinə birbaşa təsir göstərir:

“Uşaqlar da hər addımlarını paylaşmaq ehtiyacı hiss edirlər. Təəssüf ki, onları izləyən təhlükələrin fərqində deyillər. Paylaşdıqları məzmunların yaşlarına uyğun olmadığını isə ümumiyyətlə anlamırlar. Əgər valideynlər bu prosesi idarə edə bilmirsə, dövlət bu məsələyə müdaxilə etməlidir. Bu gedişata bir “dayan” demək lazımdır. Uşaqların gələcəyi naminə bu vəziyyətə mütləq şəkildə stop qoyulmalıdır”.

Fidan Hacızadə
Sfera.az

"Uşaqların sosial şəbəkələrdən istifadəsi məhdudlaşdırılmalıdır" - Sosioloq