Hindistan Azərbaycanı boykot etdi - Nələr yaşanacaq?

Xəbər verdiyimiz kimi, Azərbaycan Pakistanı dəstəklədiyi üçün Hindistanda ölkəmizə qarşı boykot elan edilib. Hindli rəsmilər Azərbaycana səfər etməməyi və Azərbaycan malları almamağa çağırıb. Hind blogerləri isə “X” şəbəkəsində "Boycott Azerbaijan" kampaniyasına başlayıblar. 

Sfera.az xəbər verir ki, mövzu ilə bağlı danışan “Azərbaycan İnformasiya və Kommunikasiya Texnologiyaları Sənayesi Assosiasiyası" İctimai Birliyinin sədri Elvin Abbasov Hindistanın boykotunun kibertəhlükə riski yarada biləcəyini deyib.

Onun sözlərinə görə, Hindistanın Azərbaycan əleyhinə başladığı kütləvi boykot kampaniyasının təsirləri yalnız ticarət müstəvisi ilə məhdudlaşmaya bilər:

“Belə hallar təcrübədə göstərir ki, iqtisadi təzyiqlə başlayan proseslər zamanla digər sahələrə, xüsusilə də informasiya təhlükəsizliyi müstəvisinə keçə bilər.Bu kontekstdə Hindistan mənşəli haker qruplarının fəaliyyət ehtimalı da nəzərdən qaçırılmamalıdır. Məlumdur ki, müxtəlif ölkələrdə ictimai narazılıq fonunda qeyri-rəsmi haker qrupları dövlət siyasətindən kənar, lakin onunla paralel şəkildə kiberhücumlar həyata keçirə bilirlər”.

Mütəxəssis nəzərə çatdırıb ki, bu səbəbdən, aidiyyəti qurumlar və strateji informasiya sistemləri mümkün təhdidlərə qarşı qabaqlayıcı tədbirlər planı hazırlamalı, kibertəhlükəsizlik səviyyəsini gücləndirməlidirlər.

Firuzə Əliyeva
Sfera.az