Unutmadıq, unutmarıq – 8 MAY
8 may 1992-ci il tarixində Şuşa şəhəri Ermənistan Silahlı Qüvvələri tərəfindən işğal edildi. Bu tarix Azərbaycan xalqının yaddaşında dərin iz buraxıb.
Sfera.az xəbər verir ki, işğal nəticəsində minlərlə azərbaycanlı öz doğma yurd-yuvasından didərgin düşərək ölkənin müxtəlif bölgələrinə məcburi köçürülmüşdü. Şəhər həm maddi, həm də mənəvi baxımdan ciddi dağıntılara məruz qalmışdı. Həmçinin, Şuşanın müdafiəsində iştirak edən təxminən 200-dən çox vətəndaşımız həlak olmuşdu.
Lakin 2020-ci ilin noyabrında Prezident İlham Əliyevin qətiyyətli iradəsi və rəşadətli Azərbaycan Ordusunun şücaəti sayəsində Şuşa düşmən işğalından azad edildi.
O vaxtdan bəri şəhərdə genişmiqyaslı bərpa və tikinti işləri həyata keçirilir. Paralel olaraq, mərhələli şəkildə yerli əhalinin doğma torpaqlarına qayıdışı təmin olunur. Qeyd edək ki, 2023-cü ildən etibarən şuşalı ailələrin geri dönüş prosesi ardıcıl şəkildə davam etdirilir.
Fidan Hacızadə
Sfera.az
