Son illərdə dekorativ sənətdə ip və mismarla hazırlanan portretlər geniş maraq doğurur. “String art” adlanan bu texnika taxta lövhə üzərində mismarlarla kontur yaradıb, rəngli iplərlə portretin və ya fiqurun işlənməsi ilə formalaşır.

Sənətkarlar bu işə böyük səbr və dəqiqliklə yanaşaraq, real portret təsvirlərini ip vasitəsilə canlandırırlar. Həm əl işi olması, həm də vizual estetikası ilə bu sənət hədiyyə və interyer üçün ən çox seçilənlər arasındadır.

Sfera.az-ın əməkdaşı iplə portret yaratma sənəti ilə məşğul olan Sahil Musayev ilə söhbət edib.

Müsahibimiz bu sənət növü ilə bağlı maraqlı nüanslara toxunub, portretin hazırlanma prosesini və sənətin xüsusiyyətlərini izah edib.

O bildirib ki, bir tablo hazırlamaq üçün ilk olaraq müvafiq ölçüdə taxta, mismarlar, çəkic və rəngli ipək saplar tələb olunur:

“Bu ləvazimatlar təmin edildikdən sonra tablo üzərində işləməyə başlamaq mümkündür. Əlavə olaraq, taxtanın üzərinə dəri və ya istənilən rəngdə parça çəkilməklə fon rəngini dəyişmək və daha estetik görünüş yaratmaq olar”.

Eyni zamanda hazırlanma prosesi ölçüyə və sifarişin mürəkkəbliyinə görə dəyişir:

“Məsələn, ad və soyaddan ibarət sadə bir tablo bir günə tamamlanır. Elə olub ki, bəzi tabloları cəmi üç saata hazırlamışam. Lakin gündüz saat 9-dan 18:00-a qədər və ya saat 19:00-dan sonra bu işə vaxt ayıra bilirəm. Gün ərzində isə orta hesabla bir tablo hazırlaya bilirəm, maksimum isə gündə iki tablo düzəltmək mümkündür.

Qiymətlər də ölçüyə uyğun olaraq dəyişir. A4 ölçüsündə standart tablolar mövcuddur. Məsələn, “ürək” forması və ya bəzi futbolçuların şəkilləri - bu ölçüdə daha çox sifariş olunur. Elə dizaynlar var ki, onların hazırlanması daha asandır. Bu cür sifarişlər eyni qiymətə, standart olaraq hazırlanır. Ad və soyad birlikdə istənildikdə isə qiymət 75 manat olur. Kim sadəcə ad və ya ad və soyad istəyirsə, bu işi 65 manata da yerinə yetirmək mümkündür”.

Hansı növ portretləri düzəltmək daha çətindir – insan, heyvan, yoxsa abstrakt?

Sualımıza cavab olaraq S.Musayev vurğulayıb ki, insan portretlərini hazırlamaq daha çətindir, çünki portretin həmin şəxsə bənzəməsi üçün əvvəlcə karandaşla dəqiq eskiz çəkilməli, üz cizgiləri və mimikalar düzgün işlənməlidir.

"Ən yaddaqalan sifarişlərimdən biri Adriano Çelentanonun portreti olub..."

"Bu mənim ilk ciddi portret sifarişim idi. Əvvəllər bir portret çəksəm də, bu işi peşəkar yanaşdığım ilk iş kimi qiymətləndirirəm. Sifarişin sahibi mənim üçün önəmli bir şəxs idi və portreti çəkilən Adriano Çelentano da məşhur sənətçi olduğuna görə bu işə daha böyük məsuliyyətlə yanaşdım. Portreti uğurla ərsəyə gətirmək üçün təxminən 5-6 dəfə karandaşla eskiz çəkdim, amma heç birini bəyənməyib cırdım. Hər dəfə mimikaları daha dəqiq ifadə etməyə çalışırdım, amma istədiyim nəticəni ala bilmirdim. Buna görə işə daha çox vaxt və səy sərf etdim. Nəticədə ortaya çıxan tablo həm müştərinin, həm də mənim ürəyimcə oldu. Bu portretin hazırlanması təxminən bir ay vaxt apardı və bu günə qədər ən yadda qalan işlərimdən biri olaraq qalır”.

İp portret ustası sənətin fərqli cəhətlərindən danışaraq diqtə edib ki, burada rəngli karandaş əvəzinə rəngli saplardan istifadə olunur.

Sənətkar bu sənətlə məşğul olmaq üçün insanda incəsənətə xüsusi marağın olmasının vacibliyindən bəhs edib. Onun sözlərinə görə, bu işi əsasən səbirli insanlar görə bilir:

“Prosesin 95 faizi səbir tələb edir. Mənim rəssamlıq üzrə hər hansı bir ali təhsilim yoxdur, tamamilə fərqli bir ixtisas üzrə təhsil almışam. Lakin məktəb illərində incəsənətə qarşı xüsusi marağım var idi və bu marağı universiteti bitirdikdən sonra özüm üçün kəşf etdim. Elə o vaxtdan bu sənətlə məşğul olmağa başladım. Bu sənətə başladığım zaman böyük planlarım var idi. Lakin zamanla başqa məqsədlərim rəssamlıqla bağlı planlarımı üstələdi. Hazırda bu işlə yalnız hobbi olaraq məşğul oluram. Gələcəkdə isə bu hobbini peşəyə çevirməyi düşünürəm”.

"İşin çətin tərəfi mismarlardır...

Sahilin sözlərin görə, prosedur zamanı təhlükəsizliyə xüsusi diqqət yetirilməlidir, əks halda əllər yaralana bilər:

“Bu cür hallar bir neçə dəfə mənim də başıma gəlib. Ümumiyyətlə, bu işin asan tərəfi demək olar ki, yoxdur, çünki olduqca səbr tələb edən bir sənətdir. Lakin zaman keçdikcə və təcrübə artdıqca, işlər tədricən insana daha asan görünməyə başlayır. Hansı sahə ilə məşğul oluruqsa, olaq, işimizin uğurlu alınması üçün onu sevərək görməliyik. Təbii ki, məsuliyyətli yanaşma da çox önəmlidir və bu, insanın şəxsi yanaşmasından asılıdır. "String art" sənətində işdəki bütün detallara diqqət yetirmək vacibdir. Mənim üçün isə ən önəmli məqamlardan biri rənglərin bir-birinə uyğunluğu və ümumi harmoniya yaratmasıdır”.

"Sevgililər ayrıldı, sifariş də məndə qaldı..."

Ödənişlərdə hər hansı problemin yaranıb-yaranmaması ilə bağlı sualımızı cavablandıran portret ustası eyni zamanda 7 illik sənət yolunda baş verən maraqlı hadisədən danışıb.

“Əvvəlcədən ilkin ödəniş alınır və sonra iş təhvil verilir. Lakin maraqlı bir hadisə baş vermişdi. Bir müştəri sifarişində “ürək” simvolunu istifadə etmişdi və orada iki baş hərfi J və A yazılmışdı. Təxminən bir il sonra həmin şəxs mənə yazdı ki, artıq ayrılıblar və buna görə də işi geri qaytarmaq istəyir. O bunu açıq şəkildə demək istəsə də, dolayısı ilə ifadə edirdi. Bildirirdi ki, “mən sizə geri qaytarım, siz də satarsınız, ya mənə pulunu verin, ya da siz alın, başqasına satarsınız”. Deyirdi, “necə olsa da, götürün”. Portreti kimə göstərdimsə, heç kəs maraqlanmadı. Həmin şəxs dəfələrlə mənə yazdı, amma nəticədə iş məndə qaldı".

Müxbir: Fidan Hacızadə

Foto: Anar Bayramlı

Sfera.az

"Cütlük ayrıldı, sifariş məndə qaldı" - "String art" yaradıcısı ilə MÜSAHİBƏ