Xəbər verdiyimiz kimi, əfv sərəncamının imzalanacağı tarix açıqlanıb. Bildirilib ki, sərəncamın may ayında imzalanması nəzərdə tutulub.

Maraqlıdır, əfv sərəncamı kimlərə şamil oluna bilər?

Mövzu ilə bağlı Sfera.az-a açıqlamasında Əfv Məsələləri Komissiyasının üzvü Əliməmməd Nuriyev bildirib ki, proses zamanı 24 göstərici üzrə qiymətləndirmə aparılır.

Ə.Nuriyev qeyd edib ki, əfv prezidentin səlahiyyətinə aid olan humanist və hüquqi institutdur, həmçinin, konkret siyasi, ictimai və hüquqi kontekstdə formalaşır:

“Əfvin kimə şamil olunacağı bir neçə meyara əsasən seçilir. İlk növbədə, şəxsin yaşı və sağlamlıq vəziyyəti, xəstəliyi və əlilliyinin olub-olmamasına baxılır. Bundan başqa, cinayətin xarakteri və cəzanın çəkilmə müddəti nəzərə alınır. Cinayət işinin təhlükəli və ya ağır olması diqqətlə müzakirə olunur. Həmin şəxsin əvvəllər cinayət törədib-törətmədiyi, məhkumluq müddətində məhkumun davranışı, özünü necə aparması, müəssisənin bununla bağlı xarakteristikası, həmçinin bir sıra sosial və humanitar meyarlar da əsas götürülür. Məhkumun yetkinlik yaşına çatıb-çatmaması da diqqətə alınan məsələlərdən biridir. Ailə üzvlərinin müraciətləri də dəyərləndirilir. Bu, ailənin şəxsi yenidən qəbul etməyə hazır olduğunu da göstərir. Uzun illərdir ki, zərərçəkmiş şəxsin mövqeyi də soruşulur, amma kontekstdə qiymətləndirilir. Ümumiyyətlə, istənilən əfv müraciətləri və vəsatətləri komissiya tərəfindən geniş, hərtərəfli müzakirə olunur. Bütün sadaladığımız meyarlar diqqətlə ölçülüb biçilir. Eyni zamanda, həmin şəxslə bağlı cəmiyyətin, dövlətin, zərərçəkmiş şəxsin mövqeyi diqqətə alınır. Bunlar arasında ortaq bir nöqtə tapılıb balanslı yanaşma tətbiq edilir”.

Komissiya üzvünün sözlərinə görə, bəzi məhkumlar xüsusi kateqoriyaya aiddir. Bunlar Qarabağ müharibəsi iştirakçısı, şəhid ailəsinin üzvü, eləcə də Azərbaycan üçün əhəmiyyətli fəaliyyətlər göstərmiş şəxslərin ailə üzvləri ola bilər.

Əfv hüququnun olmamasını iddia edən şəxslərə cavab verən Əliməmməd Nuriyev əfvin ədalət və mərhəmətin qovuşduğu bir məqam olduğunu vurğulayıb:

“Ədalətlilik məsələsi ilk növbədə məhkəmə müəyyənləşdirilir. Təbii ki, bütün hallarda məhkəmə cinayət hüququnun, cinayət prosesinin əsas prinsipi ədalətli olmasıdır. Əfv institutu isə mərhəmət institutu, humanizm institutudur. Ona görə də əfv hüququ həm də dövlətin məhkum ilə dialoqunun nəticəsidir. Bu, ikinci bir şans imkanıdır. Bəzi hallarda fikirləşirlər ki, əfv hüququ olmamalıdır. Bunlar hamısı sadəcə olaraq demaqogiya xarakteri daşıyan fikirlərdir. Əfv İnstitutunun Konstitusiyaya daxil edilməsi məhz Ulu öndərin birbaşa tövsiyəsinin nəticəsi olmuşdur. Dövlət bir tərəfdən cəzalandıran, bir tərəfdən də bağışlayandır. Dünyada nə yaranıbsa, hamısı Allahın yaratdıqlarıdır. Əgər Allah bağışlayandırsa, Allahın yaratdığını niyə bağışlamayaq?

Cənab prezidentin də fəaliyyətinin əsas prinsipləri, mərhəmət prinsipi, humanizm prinsipidir və ədalətlilik prinsipidir. Ona görə də prezident tərəfindən sərəncamlar həmişə cəmiyyət tərəfindən mütləq qaydada pozitiv qarşılanır, alqışlanılır. Bu sayədə yüzlərlə, minlərlə ailə sevinir. Bu çox böyük bir məsuliyyət, həm də ölkə vətəndaşına insan mərkəzli yanaşmanın nəticəsidir. Ona görə hesab edirəm ki, Azərbaycan Konstitusiyasında Əfv İnstitutunun mövcud olması Azərbaycan dövlətinin hüquqi təbiətini müəyyənləşdirən, humanist təbiətini göstərən bir nümunədir. Azərbaycanda Əfv İnstitutunun mütəmadi olaraq tətbiq olunması da cəmiyyət tərəfindən hər zaman pozitiv qarşılanmışdır və qarşılanmaqda davam edir. Çünki əfv nəticəsində həm insanlara yeni şans verilir, həm də mərhəmət, humanizm, ədalət öz yerini tapır”.

Ə.Nuriyev nəzərə çatdırıb ki, bəlkə də beş mindən birində əfv olunan şəxs yenidən cinayət edə bilir. Bu da onu göstərir ki, Əfv Komissiyası da öz işinə çox məsuliyyətlə yanaşır və prezidentin Əfv Komisiyyasının üzvlərinə verdiyi etimadı doğrultmağa çalışır.

Firuzə Əliyeva

Əfv sərəncamı kimlərə şamil olunacaq? - AÇIQLAMA