Saqqız çeynəmək bir çox insan üçün zövqlü və gündəlik vərdişə çevrilmiş fəaliyyətdir. Lakin Kaliforniya Universitetinin (UCLA) mühəndisləri tərəfindən aparılan yeni araşdırma bu zərərsiz görünən vərdişin ağız yolu ilə mikroplastik hissəciklərin qəbuluna səbəb ola biləcəyini ortaya qoyub.

Sfera.az xarici mediaya istinadən xəbər verir ki, professor Sancay Mohantinin rəhbərliyi ilə keçirilən tədqiqatda 5 təbii və 5 sintetik olmaqla ümumilikdə 10 fərqli saqqız markası test edilib. Hər bir saqqız könüllülər tərəfindən 4 dəqiqə müddətində çeynənib, hər 30 saniyədə bir tüpürcək nümunələri götürülüb. Bəzi hallarda çeynəmə müddəti 20 dəqiqəyə qədər uzadılıb və mikroplastik ifrazı müşahidə olunub.

Mikroskop altında 20 mikrometrdən böyük mikroplastik hissəciklər qırmızıya boyanaraq sayılıb. Tədqiqatçılar qeyd edir ki, bu metod daha kiçik hissəcikləri aşkar etmədiyindən, real göstəricilər daha yüksək ola bilər.

Tədqiqatın ən diqqətçəkən nəticəsi isə ondan ibarətdir ki, yalnız neft mənşəli sintetik saqqızlar deyil, bitki tərkibli təbii saqqızlar da eyni miqdarda mikroplastik hissəciklər ifraz edir. Hər bir qram saqqızda orta hesabla 100 mikroplastik aşkarlanıb. 6 qramlıq saqqızın isə 3 000-ə qədər mikroplastik hissəcik yaydığı müəyyən olunub.

Araşdırma zamanı məlum olub ki, mikroplastiklərin ən çox ifraz olunduğu dövr çeynəmənin ilk iki dəqiqəsidir. Bu zaman çənə hərəkəti ilə yaranan mexaniki təsir tüpürcəyin kimyəvi tərkibindən daha çox plastik hissəciklərin ayrılmasına səbəb olur. Çeynəmənin 8-ci dəqiqəsində ifrazın 94 faizi artıq tamamlanır. Alimlər gündəlik həyatımızda mümkün qədər az saqqız çeynəməyi, çeynədikdə isə onu ağızda daha uzun müddət saxlamağı tövsiyə edirlər.

Fidan Hacızadə

Saqqız çeynəməyin gizli zərəri ortaya çıxdı