Bu pəhriz ziyanlı imiş - ARAŞDIRMA

Miçiqan Universitetinin tədqiqatçıları müəyyən ediblər ki, yüksək yağlı pəhriz siçanlarda immun hüceyrələrinin infeksiyaya cavab vermə qabiliyyətini zəiflədir. 

Sfera.az xəbər verir ki, araşdırmanın nəticələri "The Journal of Immunology (JI)" jurnalında dərc olunub.

Təcrübə zamanı gəmiricilər iki qrupa bölünüb. Birinci qrup müntəzəm qida qəbul edib, ikinci qrup isə çəki artımı üçün yüksək yağlı pəhrizi izləyib. Müdaxilə başa çatdıqdan sonra neytrofillər - patogenlərlə mübarizə aparan immunitet sisteminin qoruyucu hüceyrələri hər bir fərdin qanından və sümük iliyindən təcrid olunub.

Tədqiqatçılar yüksək yağlı pəhrizin sümük iliyindəki neytrofillərin iltihabı tənzimləmək üçün vacib olan immun siqnal olan TNF-alfa toplamaq və buraxmaq qabiliyyətini pozduğunu aşkar ediblər. Neytrofillər Pseudomonas aeruginosa (sətəlcəmin törədicisi) ilə təmasda olduqda, bakteriyaları udmaqda və məhv etməkdə daha az təsirli olublar.

Alimlər həmçinin müəyyən ediblər ki, kök siçanlarda bu hüceyrə tipində yetişməmişlik və ya əksinə, qocalma əlamətləri var. Tədqiqatçılar oxşar mexanizmlərin insan orqanizmi üçün xarakterik ola biləcəyini fərz edibər. Onlar izah ediblər ki, piylənmə müxtəlif xəstəliklərə, o cümlədən infeksiyalara qarşı həssaslığın artmasına səbəb olur.

Firuzə Əliyeva