Azərbaycan xalqının qədim və sevimli bayramı olan Novruz öncəsi qeyd olunan çərşənbə günləri ölkənin hər yerində xüsusi təmtəraqla qarşılanır.

Sfera.az xəbər verir ki, baharın gəlişinin xəbərçisi sayılan bu çərşənbələr xalq arasında dərin inanclar və zəngin adətlərlə müşayiət olunur.

Ənənəyə əsasən, Novruzdan əvvəl dörd çərşənbə qeyd edilir: Su, Od, Yel və Torpaq çərşənbəsi. Hər biri təbiətin bir ünsürünü təmsil edir və insan həyatının dirçəlişi ilə bağlı rəmzi məna daşıyır.

İlk qeyd olunan Su çərşənbəsi təmizlənmə və saflıqla əlaqələndirilir. Bu gündə insanlar bulaq başına gedir, su üzərindən atlanmaqla bəd nəzərdən və pislikdən qorunacaqlarına inanırlar.

Ardınca gələn Od çərşənbəsi daxili nur və enerjinin təcəssümü kimi qəbul olunur. Tonqal qalamaq, tonqal üzərindən tullanmaq, şam yandırmaq kimi adətlər xalq arasında geniş yayılıb. İnanclara görə, alov insana ruhi rahatlıq gətirir.

Üçüncü – Yel çərşənbəsi təbiətdə canlanma və hərəkətin başlanğıcını simvolizə edir. Bu gün qulaq falı açmaq, niyyət tutmaq kimi adətlərə xüsusi önəm verilir. Yelin əsməsi torpağın nəfəs alması kimi yozulur.

Sonuncu və ən təntənəli qeyd olunan Torpaq çərşənbəsi, həm də “İlaxır çərşənbə” adlanır. Bu gündə evlərdə səməni qoyulur, bayram süfrəsi hazırlanır, yumurtalar boyanır, uşaqlar arasında “papaqatdı” oyunları keçirilir.

Hər çərşənbə Azərbaycan xalqının zəngin mədəni irsini və təbiətlə bağlı ahəngdar yaşam fəlsəfəsini əks etdirir. Qədimdən bu günə ötürülən adətlər bu gün də ailələrdə, məhəllələrdə və cəmiyyətlərdə yaşadılır, Novruzun ruhunu özündə təcəssüm etdirir.

Fidan Hacızadə

Novruz çərşənbələri - Hər biri təbiətin bir ünsürünü təmsil edir