Ailədə tərəflərdən birinin daha çox qazanması hansı problemlərə səbəb olur? - AÇIQLAMA
İqtisadi durum ailə münasibətlərinə təsirsiz ötüşmür. Xüsusən də gəlir fərqlilikləri evli cütlüklər arasındakı münasibətlərdə mühüm rol oynayır.Çox qazanan özünü daha dominant hiss edir.
Bəs gəlir fərqliliyi münasibətlərdə nə kimi problemlər yarada bilər?
Mövzu ilə bağlı Sfera.az-a danışan psixoloq Ləman Məmmədova bildirib ki, gəlir fərqliliyi bir tərəfin digərinə nisbətən daha çox qazanc əldə etməsi deməkdir:
"Gəlir fərqliliyi, ilk növbədə maliyyə gərginliyinə səbəb ola bilər. Yüksək gəlirli tərəf bəzən digərini iqtisadi cəhətdən asılı hiss edir və bu da münasibətə zərər verir. Gəlir fərqliliyi ilə bağlı yaranan narahatlıq cütlüklər arasında mübahisələrə və ya hətta emosional uzaqlaşmaya səbəb ola bilər. Bu vəziyyət tərəflər arasında psixoloji təzyiq yaradır.Bu hal münasibətlərdəki güc dinamikalarını dəyişdirə bilər. Yüksək gəlirli tərəf peşə və şəxsi həyatında daha çox liderlik gücünə sahib olur. Həmçinin gəlirli tərəf özünün daha "üstün" və "güclü" olduğunu düşünərək, digər tərəfə qarşı sərt və nəzarətçi bir mövqe sərgiləyir.
Psioxoloq qeyd edib ki, az gəlirli tərəf özünü sosial və ya şəxsi cəhətdən zəif hiss edir:
"Bu, şəxsi inam və münasibətlərə mənfi təsir göstərir. Gəlir fərqliliyinin mənfi təsirlərini azaltmaq üçün düzgün ünsiyyət çox vacibdir. Bu məsələyə yanaşarkən, tərəflərin bir-birinə hörmət və anlayış göstərməsi vacib amillərdən biridir. Bu cür vəziyyətlərdə tərəflərin iş və karyera baxımdan bir-birinə dəstək verməsi münasibətin sabitliyini qorumağa kömək edir. Evli cütlüklər arasında gəlir fərqliliyi münasibətlərdə gərginliyə və emosional təzyiqlərə səbəb olsa da, bu, sağlam ünsiyyət, qarşılıqlı dəstək və anlayışla həll edilə bilən bir problemdir. Hər iki tərəf gəlir fərqliliyinin yaratdığı təzyiqi qarşılıqlı hörmət və anlayışla idarə etməyə çalışmalıdır. Əgər bu məsələyə düzgün yanaşılarsa, gəlir fərqliliyi münasibətə daha az təsir göstərəcək və tərəflər arasında daha sağlam və balanslı bir əlaqə yaranacaq".
Ülkər Abdurahmanlı
