Bakıda məşhur mağazada vətəndaşa pul "atdılar" - FOTO

Son zamanlar alış-veriş zamanı mağazalarda bir məhsulun qiymətinin 2 dəfə çıxılması və ya vitrində bir, kassada başqa qiymətlərlə bağlı şikayətlərlə sıx rastlaşırıq.Saytımıza daxil olan şikayətlərdən biri də bununla bağlıdır.

Belə ki, bir müştəri iyun ayında gözəllik və sağlamlıq məhsulları satılan "Baharstore" mağazasından alış-veriş edib. Ödəniş zamanı kartdan məhsulların endirimsiz qiyməti çıxılıb. Müştəri bunu sonradan, qəbzə baxanda bilib və mağazaya bildirib. Hər dəfə bir bəhanə ilə ödəniş yubadılıb. Artıq hadisənin üstündən 7 ay keçib, mağaza bildirir ki, yalnız ödəniş qəbzi göndərilsə, pul qaytarıla bilər.Təbii ki, 7 ay ərzində qəbzin saxlanılması da ağılabatan deyil. Digər tərəfdən, mağazada bütün məlumatlar saxlanılmalıdır. Xüsusən də, bir məsələ aylardır həllini tapmırsa, ən azından, məsul şəxslərin bu barədə məlumatı olmalıdır. Araşdırma aparmaqla özlərinə əziyyət vermək istəmədiklərinə görə, qəbz belə müştəridən tələb olunur. Nəzərə alsaq ki, sözügedən mağaza ölkəmizdə kifayət qədər tanınır, bu kimi halların yaşanması müştərilərdə inamsızlıq yaradır. 

Maraqlıdır, belə olan halda mağaza hansı məsuliyyəti daşıyır? Pozulan qanunlara görə rəhbərliyini nə kimi cəzalar gözləyir? 

Mövzu ilə bağlı Sfera.az-a açıqlama verən vəkil Turan Abdullazadə bildirib ki, qeyd edilən məsələ ticarət qaydaları əleyhinə olan inzibati xətanın tərkibi ola bilər.

 
Onun sözlərinə görə, mağazanı 1000 manatdək cərimə gözləyir:

“İnzibati Xətalar Məcəlləsinin 445-ci maddəsində qiymət intizamının pozulması ilə bağlı sanksiyalar nəzərdə tutulur. Belə ki, qiymət intizamının pozulmasına, yəni satışda olan malların üzərində qiymət kağızlarının və ya göstərilən xidmətlər və ya işlər üçün qiymət cədvəllərinin (menyuların) olmamasına və ya onların düzgün tərtib edilməməsinə görə 800 (səkkiz yüz) manatdan 1000 (min) manatadək məbləğdə cərimə edilir”.

T.Abdullazadə qeyd edib ki, vətəndaş bu barədə müvafiq qurumlara müraciət edə bilər:

“Bu maddədə nəzərdə tutulmuş inzibati xətalar haqqında işlərə Antiinhisar və İstehlak Bazarına Nəzarət Dövlət Xidməti qismində Azərbaycan Respublikasının İqtisadiyyat Nazirliyi baxır. Narazı qalan vətəndaşlar elektron poçt, rəsmi sayt və ya yazılı qaydada Antiinhisar və İstehlak Bazarına Nəzarət Dövlət Xidmətinə müraciət edə bilər. Müvafiq dövlət qurumu mağazanın əməllərində inzibati xəta tərkibi müəyyən edərsə, bununla bağlı tədbirlər görə və vətəndaşın pulunun qaytarılması istiqamətində köməklik göstərə bilər”.

Firuzə Əliyeva