Zaman-zaman Bakı Metropoliteninin stansiyasında faciəvi hadisələrin qeydə alındığını görürük. Xüsusilə də qatar platformaya daxil olan zaman sərnişinlərin relsin üzərinə düşərək öldüyü barədə xəbərlər olur.

Maraqlıdır, bu cür halların qarşısı necə alına bilər?

Bununla bağlı Sfera.az-a açıqlama verən nəqliyyat məsələləri üzrə ekspert Aslan Əsədov deyib ki, Bakı metrosu Sovet İttifaqı dövründə çəkilən tunel və relslər üzərində qurulub:

“Stansiyaların həndəsi ölçüləri və dayaqların ümumi ölçüsü hardasa sərnişin axınının istiqamətlənməsini yüksək səviyyədə təmin edə bilmir. Məsələn, "28 May", "İçərişəhər", "Sahil" stansiyalarının sərnişin tutumu ilə "Koroğlu" metrosu və yaxud "Ulduz" metrostansiyasının sərnişin tutumu eyni deyil, söhbət platformadan gedir... O cümlədən platformalarda qatar qəbulunun ümumi olaraq 5 vaqon tipli olması da, əlavə olaraq özündə bir sərnişin daşımada gərginlik yarada bilir. Sıxlığı daha yüksək olan "28 May", "İçərişəhər", "Sahil", "Koroğlu", "20 Yanvar" və digər stansiyalarda, innovativ istifadə qaydalarını və müasir texnologiyanın istifadə edildiyi şüşə çəpərləmə sistemlərini tətbiq etmək olmur. Düzdür, bu, bəzi stansiyalarda mümkündür. Orta dayaq sütunları, icazə verilən sərnişin axınını təmin edə bilirsə, burada platformalara yaxınlaşan zaman şüşə arakəsmələrdən istifadə ola bilər. Mahiyyət etibarilə stansiyaya daxil olan qatar dayanır, platformada şüşə arakəsmə açılır və sərnişinlər təhlükəsiz şəkildə düşə, minə bilirlər”.

Ekspert bildirdi ki, bu gün sərnişin axınlarına nəzər salan zaman, metrodan istifadə edənlərdə müəyyən psixoloji gərginliklərin yaşandığını da görmək olar:

“Taksidən gəlib düşənlər, zamanına qənaət edənlər, səhhətində hər hansı problemlər olanlar metroya yaxınlaşır və sərnişinlərin sayının çoxluğunu görürlər, onlarda psixoloji gərginlik yaşanır...Yəni bunlar hamısı bir nöqtədə birləşir və nəticədə istər özündəngetmə və yaxud xəttə düşmə kimi hadisələr baş verir. Birinci növbədə, icazə verilən stansiyalarda şüşə ara kəsmələrin tətbiq edilməsi vacibdir. İkincisi, stansiyalardakı sarı xətlərə müəyyən səs, işıq siqnalizasiyası quraşdırıla bilər. Şəxsə xəbərdarlıq tuneldə olan maşinist köməkçisinin, platformanı tənzimləyən və metronu istiqamətləndirən əməkdaşın səsucaldıcıdan istifadəsi ilə deyil, texnologiya ilə də edilə bilər”.

Günay Rəsulqızı

Metrodakı faciəvi hadisələrin qarşısı necə alına bilər? - Ekspertdən TƏKLİF