Qüvvədə olan qanuna görə, nəqliyyat vasitəsindən bayıra hər hansı əşya atılmasına görə otuz manat məbləğində cərimə edilir. İnzibati Xətalar Məcəlləsinə təklif olunan dəyişiklikdə bu məbləğin artırılması nəzərdə tutulur. Belə ki, fiziki şəxslər 200 manat məbləğində, vəzifəli şəxslər 1000 manat məbləğində, hüquqi şəxslər 4000 manat məbləğində cərimə ediləcək. 

Cərimələrin artırılması müzakirə mövzusuna çevrilib. Təbii ki, ətraf mühitin təmizliyi üçün küçəyə zibil atılması yolverilməzdir.

Bəs ölkənin magistral yollarında, həmçinin prospektlər və küçələrdə sürücülərin zibili ata biləcəyi kifayət qədər konteyner və zibil qutuları varmı?

Mövzu ilə bağlı Sfera.az-a açıqlamasında “Azad İstehlakçıdlar” İctimai Birliyinin (AİİB) sədri Eyyub Hüseynov cərimələrin bu qədər artırılmasının tərəfdarı olmadığını deyib:

“Bəli, ölkəmizdə zibilləri küçəyə atmaq mədəniyyətsizliyi mövcuddur. Öncə əhalinin mədəniyyəti dəyişməlidir. Lakin cərimə məbləği də çox artırılıb. Cərimələrin artırılması fonunda konteynerlərin qoyulmaması qəribə haldır. Təbii ki, ətraf mühitin təmizliyi üçün cərimələrin artırılmasının tərəfdarıyam, lakin onların effektli icra mexanizmi olmalıdır. Çox yaxşı olardı ki, bu işlə məşğul olan qurumlar kütləvi informasiya vasitələri ilə fəal işləsinlər”.

Onun sözlərinə görə, ölkə ərazisində kifayət qədər zibil qutusu və konteyner yoxdur:

“Parisdən də təmiz olan Bakı şəhəri get-gedə zibillərdən təmizlənir. Lakin hələ də zibil qutularının azlığı ilə bağlı problem mövcuddur. Dəfələrlə rayon yolunda zibil qutusu olmadığı üçün həmin zibilləri özümlə Bakıya gətirmək məcburiyyətində olmuşam. Bakıda hətta bəzi yerlərdə zibil qutuları özəlləşdirilib. Belə ki, Zooparkın yanında bir adam kafe açıb, zibil qutusu qoyub, başqası oraya zibil atanda onları təhqir edir”.

E.Hüseynov çayların çirkləndirilməsi ilə bağlı narahatlığını da ifadə edib:

“Ən narahat olduğum məsələlərdən biri də çayların çirkləndirilməsidir. Keçən həftə Masallı zonasında oldum. Viləşçaya o qədər tullantı atılıb ki, dəhşətli vəziyyətdədir. Mən məəttəl qaldım ki, buranın icra başçısı yoxdurmu? Şimal zonasında da bu problemlər yaşanır”.

Firuzə Əliyeva