Naxçıvanda 19 mindən çox dondurmada bakteriyalar AŞKARLANDI -FOTO

Azərbaycan Respublikasının Qida Təhlükəsizliyi Agentliyi tərəfindən aparılan nəzarət tədbirləri ilə bir neçə dondurma məhsulu partiyasında “enterobacteriaceae” bakteriyaları aşkarlanıb. Uyğunsuzluq aşkarlanmış dondurmaların satışdan geri çağırılması barədə Naxçıvan Muxtar Respublikası Qida Təhlükəsizliyi Agentliyi tərəfindən ticarət şəbəkələrinin rəhbərlərinə xəbərdarlıq edilib.

Sfera.az xəbər verir ki, bu barədə Naxçıvan Muxtar Respublikası Qida Təhlükəsizliyi Agentliyindən bildirilib.

Qeyd edilib ki, məhsulların geri çağırılması ilə bağlı topdançı şirkətlər tərəfindən agentliyə yazılı müraciət daxil olub və 9240 ədəd “Qoşa qapı” əmtəə nişanlı vanilli “Eskimo”, 7440 ədəd “İçərişəhər” əmtəə nişanlı vanilli plombir və 2880 ədəd “Yolka” əmtəə nişanlı qaymaqlı dondurma məhsulları olmaqla, ümumilikdə, 19 min 560 ədəd məhsulun məhv edilməsi barədə müvafiq qərar qəbul edilib. Məhvetmə prosesi agentlik əməkdaşlarının iştirakı ilə bu gün həyata keçirilib.