“Böhtan atmaqla, dedi-qodu yaymaqla…” – Turan İbrahimovdan SƏRT SÖZLƏR 

Azərbaycan telekanallarının mart ayı üçün açıqlanan “Youtube” reytinq cədvəli səs-küyə səbəb olub.

Sfera.az-ın məlumatına görə, bununla bağlı danışan tanınmış teleaparıcı Turan İbrahimov deyib ki, sözügedən siyahıya inanmayanlar, qəbullana bilməyənlər qeyri-peşəkar davranırlar:

““Youtube” nəticələrini hamı hesablaya bilər. İstənilən kanalın əsas səhifəsini açın, xəbər lenti, videolar bölməsinə girin və günlər üzrə neçə post paylaşıldığını sayın. Sonra həmin videoların altındakı baxış sayını toplayın, alınan rəqəm nədirsə, nəticə də odur. Əgər söhbət günlük reytinqdən gedirsə....Eyni şeyi aylıq hesablamada da etmək olar. Kor- kor, gör- gör”.

Jurnalist qeyd edib ki, adətən müəyyən videoların baxışı aylarla davam edə bilər:

“Ona görə də 3 ay əvvəlki bir dövrü indi hesablasanız, fərqli rəqəm ortaya çıxa bilər. O da beş aşağı, beş yuxarı bir fərq olacaq. Ümumiyyətlə, peşəkar insanlar obyektiv olmalıdırlar. Başqalarının uğurunu və öz uğursuzluqlarını soyuq başla təhlil edib problemi aradan qaldırmalıdırlar. Problemi aradan qaldıra bilmirlərsə, deməli aradan qaldıracaq mütəxəsisləri cəlb etməlidirlər. Günahı başqalarında yox, özlərində görməlidirlər. Böhtan atmaqla, dedi-qodu yaymaqla, guya rişxənd etməklə reallığı dəyişmək mümkün deyil”.

Türkan