Son 50 ildə dünyada əhali sayının sürətlə artmasının səbəbləri bəlli olub.

Sfera.az BMT-nin məlumatlarına istinadən xəbər verir ki, son 50 ildə dünyada əhali sayının sürətlə artmasının əsas səbəblərindən biri insanların orta ömürünün uzanmasıdır.

2021-ci ilin məlumatına əsasən, insanlar 1990-cı ilə nisbətən orta hesabla 10 il çox yaşayır. 1973-cü illə müqayisədə isə insanların orta ömrü 13,7 il artıb.

BMT-nin hesablamalarına əsasən 1973-cü ildə insanların orta ömür müddəti 59,3 il olub. Bu göstərici 1990-cı ildə 63 ilə, 2020-ci ildə 71,3 ilə, 2021-ci ildə 73 ilə çatıb.

Yaşadığımız əsrin ortalarında orta ömrün 77-78 ilə çatacağı proqnozlaşdırılır.

Orta ömür müddətinin uzanması insanların daha sağlam həyat tərzi sürməsi, daha keyfiyyətli tibbi xidmətlərdən istifadə etməsi, yoluxucu xəstəliklərə qarşı mübarizənin səmərəliliyinin artırılması ilə izah olunur.

İnsanların orta ömrünün uzanması ilə yanaşı doğulan uşaqlar arasında ölüm nisbəti də xeyli azalıb. 1990-cı ildə diri doğulan hər 1000 uşaqdan 64,6-sı öldüyü halda, 2021-ci ilin əvvəlində bu göstərici 28,4-ə düşüb.

İnsanların orta ömrünün uzanması və uşaqlar arasında ölüm səviyyəsinin azalmasından sonra dünyada əhali sayı sürətlə artıb. 1973-cü ildə 3,92 milyard nəfər olan əhali sayı 2022-ci ilin noyabrında 8 milyard nəfəri ötüb.

Bu, son 250 ildə əhali sayında ən sürətli artımdır.

Bununla belə, son illərdə dünya əhalisinin sayının artım sürəti 50 il əvvəlki dövrlə müqayisədə xeyli azalıb. 1973-cü ildə əhalinin artım sürəti 2 faiz olduğu halda, 2021-ci ildə 0,86 faizə geriləyib.

Əhalinin yaşlanmasını və artım sürətinin azalmasını nəzərə alan ekspertlər proqnozlaşdırır ki, dünyada əhali sayı 2050-ci ildə 9 milyard nəfərə çatdıqdan sonra tədricən azalmağa başlayacaq və bu proses uzun müddət davam edəcək.

Vasif