“Apple” uzun illərdir istifadə etdiyi rəqəmsal köməkçi “Siri”də köklü dəyişiklik etməyə hazırlaşır. Şirkət iOS 27 yeniləməsi ilə birlikdə “Siri”ni “ChatGPT” və “Google Gemini”yə bənzər inkişaf etmiş süni intellektli söhbət robotuna çevirməyi planlaşdırıb.

Sfera.az xəbər verir ki, “Bloomberg”in məlumatına görə, “Apple” bu addımla süni intellekt strategiyasını tamamilə yeniləyir.

Şirkət daxilində “Campos” kod adı ilə tanınan yeni sistem “iPhone”, “iPad” və “Mac” cihazlarında mövcud “Siri” təcrübəsini əvəz edəcək.

Məlumata əsasən, istifadəçilər “Siri”ni əvvəlki kimi səsli əmrlərlə aktivləşdirə biləcəklər. Lakin yenilənmiş versiya danışıq əsaslı interfeysə malik olacaq, daha axıcı dialoqlar quracaq və söhbətin kontekstini izləmək imkanına sahib olacaq.

Yeni nəsil süni intellektli köməkçi veb axtarışı aparmaq, şəkil yaratmaq, mətnləri xülasə etmək və yüklənmiş faylları analiz etmək kimi geniş funksiyalar təqdim edəcək. Sistem həmçinin “Apple”ın əsas tətbiqlərinə dərin inteqrasiya edilərək şəxsi məlumatlar üzərindən təbii dil əmrləri ilə faylların tapılması və e-poçt mətnlərinin hazırlanması kimi mürəkkəb tapşırıqları yerinə yetirə biləcək.

Qeyd olunub ki, bu yenilik “iOS 27” və “macOS 27” yeniləmələri ilə təqdim ediləcək. Layihənin “Google” ilə bağlanan razılaşma çərçivəsində xüsusi “Gemini” süni intellekt modeli ilə dəstəklənəcəyi bildirilib.

“Apple” bu dəyişikliklə sadəcə mövcud interfeysdə kiçik təkmilləşdirmələr aparmaqdan imtina edərək, süni intellekt sahəsində daha iddialı və genişmiqyaslı transformasiyaya imza atmağı hədəfləyib.

Bəsti Rəfizadə
Sfera.az

“Apple”dan köklü dəyişiklik: Yeni robot yaradılacaq