“Antiterror əməliyyatı Azərbaycanın müasir tarixində dönüş nöqtəsidir” - Deputat
“19–20 sentyabr 2023-cü il antiterror əməliyyatı Azərbaycanın müasir tarixində dönüş nöqtəsi oldu. Bu əməliyyat sayəsində ölkənin ərazi bütövlüyü və konstitusiya quruluşu tam bərpa edildi. Bu gün Azərbaycan bayrağı artıq bütün suveren ərazilərimizdə əzəmətlə dalğalanır”.
Bu sözləri açıqlamasında Milli Məclisin deputatı Vasif Qafarov deyib.
O xatırladıb ki, İkinci Qarabağ müharibəsindən sonra imzalanan 10 noyabr 2020-ci il tarixli üçtərəfli bəyanata baxmayaraq, Ermənistan öz hərbi birləşmələrini Azərbaycanın Qarabağ bölgəsindən çıxarmadı. Əksinə, qeyri-qanuni silahlı dəstələrin sayı artırıldı, yeni silah-sursat gətirildi, müxtəlif istiqamətlərdə təxribatlar törədildi. 2021–2023-cü illərdə Azərbaycan Ordusunun mövqeləri mütəmadi atəşə tutuldu, ərazidə minalar basdırıldı, dinc əhaliyə qarşı terror aktları həyata keçirildi:
“2023-cü ilin 19 sentyabrında Əhmədbəyli–Füzuli–Şuşa avtomobil yolunda törədilən mina partlayışı nəticəsində mülki şəxslər və hərbçilərimiz həlak oldu, ordumuzun mövqeləri müxtəlif çaplı silahlardan atəşə tutuldu. Bu hadisə Azərbaycanı antiterror əməliyyatına başlamağa məcbur etdi”.
“2023-cü il sentyabrın 19-da Azərbaycanın Qarabağ iqtisadi rayonunda Ermənistan silahlı qüvvələrinin törətdiyi genişmiqyaslı təxribatların qarşısını almaq məqsədilə Azərbaycan Ordusu lokal xarakterli antiterror əməliyyatına başladı. Əməliyyatın əsas məqsədi qanunsuz silahlı dəstələrin tərksilah edilməsi, konstitusiya quruluşunun bərpası və ölkənin tam suverenliyinin təmin olunması idi. Cəmi 23 saat 43 dəqiqə davam edən əməliyyat sentyabrın 20-də qələbə ilə başa çatdı. Rəşadətli Azərbaycan Ordusu qarşıya qoyulmuş bütün vəzifələri yüksək peşəkarlıqla icra etdi. Beləliklə, Azərbaycan dövlətçiliyi üçün tarixi əhəmiyyət daşıyan növbəti parlaq Zəfər qazanıldı.
Qısa müddət ərzində 406 kvadratkilometr ərazi yad ünsürlərdən təmizləndi. Ordumuzun dəqiq zərbələri nəticəsində düşmənin yüzlərlə hərbi texnikası məhv edildi, on minlərlə silah-sursat ələ keçirildi. Əməliyyat zamanı hərbçilərimiz ağır relyef və möhkəmləndirilmiş istehkamların mövcudluğuna baxmayaraq, böyük peşəkarlıq və qəhrəmanlıq nümayiş etdirdilər. Əməliyyatın başlanmasından öncə Azərbaycan mülki əhalinin təhlükəsizliyini təmin etmək üçün xəbərdarlıqlar edib, SMS bildirişləri göndərib, vərəqələr paylayıb və humanitar dəstək tədbirləri həyata keçirib. Bu, dövlətimizin beynəlxalq humanitar hüquqa sadiqliyinin bariz nümunəsi idi. Cəmi bir gün ərzində separatçılar ağ bayraq qaldırmağa məcbur oldular. Ermənistan ordusu tam tərksilah edildi və Azərbaycan ərazisini tərk etdi. Sentyabrın 28-də separatçı rejimin rəhbəri Samvel Şahramanyan qondarma qurumun ləğvi barədə sənəd imzaladı. Bununla da Qarabağda separatizmə son qoyuldu. Müzəffər Ali Baş Komandan cənab İlham Əliyev 2023-cü il oktyabrın 15-də Xankəndi, Xocalı, Xocavənd və Ağdərə şəhərlərində üçrəngli Azərbaycan bayrağını ucaltdı. Bu, dövlətimizin tam suverenliyinin təmin olunmasının rəmzi idi. Bununla da, Azərbaycanın köksünə basdırılmış erməni bombası tam zərərsizləşdirildi, Azərbaycana qarşı yüz ildən artıq davam edən erməni separatizminə birdəfəlik son qoyuldu və bölgədə ədalət və sülh təmin edildi”, - deputat əlavə edib. (İqtisadiyyat.az)
