Ev almaq asanlaşacaq - TƏKLİF

Son illərdə ölkəmizdə mənzil bazarında qiymətlərin sürətlə artması müşahidə olunur. Paytaxtda və regionlarda tikinti sektorunda canlanmaya baxmayaraq, artan tələbat və iqtisadi amillər nəticəsində evlərin qiyməti əhəmiyyətli dərəcədə yüksəlib.

 

Bu proses, xüsusən də orta gəlirli və gənc ailələrin mənzil sahibi olmasını daha da çətinləşdirir. İpoteka kreditləri bu sahədə mühüm dəstək mexanizmi sayılsa da, artan qiymətlər fonunda mövcud kredit şərtləri əvvəlki kimi effektiv deyil. Belə ki, mənzillərin dəyəri bahalaşdığı halda, ipoteka kreditlərinin maksimum məbləği uzun müddətdir dəyişməz qalıb. Nəticədə, mənzil almaq istəyən vətəndaşlar daha çox ilkin ödəniş etmək məcburiyyətində qalırlar ki, bu da onların büdcəsinə əlavə yük yaradır. 

 

Mövcud vəziyyət fonunda gündəmə gələn əsas sual budur: mənzil bazarındakı bahalaşmanı nəzərə alaraq ipoteka kreditlərinin maksimum məbləği artırılmalıdırmı?

 

Mövzu ilə bağlı Sfera.az-a açıqlama verən Milli Məclisin deputatı Vüqar Bayramov bildirib ki, ipoteka kreditləşməsinin şərtlərində dəyişiklik olub. Xüsusən də, güzəştli ipoteka krediti almaq hüququ olan vətəndaşlarımızın dairəsi genişləndirilib, siyahıya yeni kateqoriyalar əlavə olunub. 

 

 

Onun sözlərinə görə, bu müddətdə məbləğlərdə də artımlar qeydə alınıb. Ən əsası ipoteka kreditləşməsi üzrə ödənilən vəsaitlərin məbləğində artım müşahidə olunub. 

 

Millət vəkili bütövlükdə şərtlərin daha da təkmilləşdirilməsini təklif edib:

 

"Nəzərə alsaq ki, son illər paytaxtın əmlak bazarında qiymət artımları müşahidə olunur. Bu səbəbdən güzəştli ipoteka üçün güzəştli məbləğin 100 min manatdan 150 min manata çatdırılmasını təklif edirik. Bu, praktiki olaraq, vətəndaşlarımızın güzəştli kreditlərdən istifadə edərək uyğun mənzil almasına imkan yarada bilər".

 

V.Bayramov faizlərin azaldılmasını da təklif edib:

 

"Güzəştli ipoteka kreditləri üzrə faizlərə baxılması və faizlərin azaldılmasınə təklif edirik. Nəzərə alsaq ki, güzəştli ipoteka kreditləri dövlət büdcəsindən maliyyələşir, bu kreditlər üzrə faizlərin azaldılması və daha aşağı faizlə təklif edilməsi mümkündür. Bu istiqamətdə təkmilləşmələrin davam etməsi məqsədəuyğundur. Yeni çağırışlar ipoteka kreditlərinin şərtlərində, xüsusən də növlərində dəyişikliklərin edilməsini zəruriləşdirib".

 

Firuzə Əliyeva
Sfera.az