ChatGPT artıq 18 yaşdan kiçik olduğundan şübhələndiyi hallarda istifadəçilərdən şəxsiyyətini pasport vasitəsilə təsdiqləməyi tələb etməyə başlayıb.

Sfera.az xəbər verir ki, bu barədə “Habr” portalı məlumat yayıb.

Yoxlama tamamlanana qədər sistem “böyüklər üçün” kimi işarələnmiş mövzulara çıxışı məhdudlaşdırır. Bəzi hallarda bu tələb hətta yetkin istifadəçilərə də göstərilir. Onlardan biri bildirib ki, 30 yaşı olmasına baxmayaraq, ondan da verifikasiya tələb olunub.

OpenAI yeni funksiyanın mərhələli şəkildə tətbiq edildiyini və hazırda əsasən ingilisdilli regionlarda sınaqdan keçirildiyini təsdiqləyib. Şirkətin açıqlamasına görə, yeniliyin məqsədi yaş məhdudiyyətlərinə əməl olunması və yetkinlik yaşına çatmayanların potensial arzuolunmaz kontentdən qorunmasının gücləndirilməsidir.

Şirkət vurğulayır ki, pasport məlumatlarının işlənməsi təhlükəsizlik tələblərinə uyğun şəkildə qurulub: məlumatlar şifrəli formada ötürülür və yalnız yaşın təsdiqi üçün istifadə olunur, sənədlərin açıq şəkildə saxlanması üçün deyil.

Yeni mexanizm auditoriya tərəfindən birmənalı qarşılanmayıb. Bəzi istifadəçilər bunu rəqəmsal təhlükəsizlik və tənzimləyici tələblərə uyğunluq baxımından məntiqli addım kimi dəstəkləyib.

Digər hissə isə mexanizmin həddindən artıq olması və yetkin istifadəçilərin də yanlış olaraq məhdudiyyətlərə düşməsi səbəbindən tənqid edib.

OpenAI dəqiqləşdirib ki, mövcud verifikasiya versiyası test xarakteri daşıyır. Şirkət istifadəçilərin rəylərini təhlil edir və yaşın təsdiqi üçün bank kartları və rəqəmsal identifikatorlar kimi alternativ üsulları da nəzərdən keçirir.

ChatGPT istifadəçilərin yaşını pasportla yoxlamağa başladı