Cənubi Koreyadan Trampa təklif: “Sülh elçisi olun”

Cənubi Koreya Prezidenti Li Cae Myunq ABŞ Prezidenti Donald Trampdan Şimali Koreya ilə danışıqlarda “sülh elçisi” rolunu üzərinə götürməsini istəyib. Bu barədə ölkənin Xarici İşlər naziri Ço Hyun məlumat verib.

 

Sfera.az xarici mediaya istinadən xəbər verir ki, nazirin sözlərinə görə, Prezident Li, Trampın liderlik keyfiyyətlərindən istifadə edərək Koreya yarımadasında hərbi gərginliyin azaldılması üçün Şimali Koreyanı müzakirələrə cəlb etməsini təklif edib.

 

Ço bildirib ki, Tramp bu istəyı müsbət qarşılayıb və Pxenyanla yenidən əlaqə qurmağa hazır olduğunu açıqlayıb.

 

Ço Hyun Rusiya-Ukrayna müharibəsindən sonra beynəlxalq vəziyyətin daha da qeyri-sabitləşdiyini vurğulayaraq, Koreya yarımadasında mümkün hərbi toqquşmalardan ciddi narahat olduqlarını bildirib:

 

“Şimali Koreya ilə dialoqu bərpa etmək məcburiyyətindəyik. Ən azı təcili rabitə xətti yaradılmalıdır”.

 

Nazir həmçinin qeyd edib ki, yarımadanın nüvə silahlarından azad olunması vacibdir:

 

“Bu, ordular arasında etimadın bərpası və hərbi gərginliyin azaldılması üçün yeni hökumətin əsas siyasətidir”.

 

Ço Hyun hökumətin Çinlə də əlaqələri genişləndirmək niyyətində olduğunu bildirib. Onun sözlərinə görə, Çin Xalq Respublikasının Xarici İşlər naziri Van Yi ilə konstruktiv görüş keçirilib.

 

Bununla belə, o, Sarı dənizdə Çinin Cənubi Koreyanın suverenliyini pozaraq qurduğu obyektlərdən narazılıqlarını çatdırdıqlarını vurğulayıb:

 

“Bu qurumlar aradan qaldırılmalıdır. Əks halda, müvafiq addımlar atmağı nəzərdən keçirəcəyik”, – deyə nazir əlavə edib.

Bəsti Rəfizadə
Sfera.az