"Hücumdan əvvəl mənə xəbər verilməyib" - Tramp təkzib etdi

ABŞ Prezidenti Donald Tramp İsrailin Qətərə həyata keçirdiyi hava hücumu öncəsi onun məlumatlandırıldığı barədə iddiaları rədd edib.

 

Sfera.az xəbər verir ki, Ağ Evdə jurnalistlərin suallarını cavablandıran Tramp, İsrail Baş naziri Benyamin Netanyahunun hücumdan əvvəl onu xəbərdar edib-etmədiyi ilə bağlı suala “Xeyr” cavabını verib.

 

Bununla da Tramp Netanyahunun hücum öncəsi ona zəng etdiyinə dair iddiaları təkzib edib.

İsrail Baş nazirliyinin açıqlamasında da Netanyahunun Trampı məlumatlandırdığı barədə xəbərlər inkar olunub.

Bununla belə, ABŞ mediası, o cümlədən "Axios", bəzi israilli rəsmilərə istinadən yazıb ki, Netanyahu Trampa ABŞ saatı ilə səhər 08:00-da zəng edib, hücum isə 08:51-də baş verib. Mənbələrin iddiasına görə, Tramp hücuma etiraz etməyib.

ABŞ rəsmiləri isə hücum barədə yalnız təyyarələr havaya qalxdıqdan sonra xəbərdar olduqlarını və dərhal İsraildən izahat istədiklərini açıqlayıb.

 

Bildirilir ki, Trampın Orta Şərq üzrə xüsusi nümayəndəsi Stiv Vitkoff Qətəri məlumatlandırmaq istəsə də, gecikib.

 

Xatırladaq ki, sentyabrın 9-da İsrail ordusu Qətərin paytaxtı Dohada HƏMAS nümayəndə heyətinin yerləşdiyi binaya hava zərbəsi endirmişdi. Hücum nəticəsində HƏMAS Siyasi Bürosunun üzvü Xəlil əl-Hayyenin oğlu, 4 HƏMAS üzvü və bir qətərli polis olmaqla 6 nəfər həyatını itirmişdi.

 

Netanyahu isə sentyabrın 10-da verdiyi açıqlamada Qətərə xəbərdarlıq edərək: “Onları ya ölkədən çıxarırsınız, ya da ədalətə təhvil verirsiniz. Bunu etməsəniz, biz edəcəyik” sözləri ilə yeni hücum təhdidi səsləndirmişdi.

 

Niyaz Hacıyev
Sfera.az