Ermənistan Silahlı Qüvvələri 5 döyüş postunu Azərbaycan tərəfinə təhvil verib. Proses Qazax rayonunun Bağanıs Ayrım kəndi ilə Ermənistanın Bağanis və Voskepar kəndləri istiqamətində baş tutub.

Bu proses 1990-cı illərin əvvəllərindən bəri ilk dəfə olaraq atəş açılmadan torpaqların geri qaytarılması faktıdır.

Döyüş postlarının döyüşsüz və razılıq əsasında təhvil verilməsini iki ölkə arasında "etimad quruculuğu" kimi qiymətləndirmək olarmı? Həmçinin, bu prosesi sülh müqaviləsi öncəsi yol xəritəsi adlandırmaq olarmı?

Sfera.az-a bu haqda açıqlama verən sabiq deputat, siyasi elmlər doktoru Elşad Mirbəşiroğlunun sözlərinə əsasən, Ermənistan tərəfindən 5 döyüş postunun Azərbaycana geri qaytarılması 2020-ci ildə Vətən müharibəsində qazanılan qələbənin strateji davamı və nəticəsidir:

“Çox yaxşı bilirik ki, Ermənistan heç bir halda Azərbaycan ərazilərini öz xoşu ilə, mövqeləri isə könüllü şəkildə təhvil verməzdi. Biz çox inamlı qələbə qazandıq və Ermənistan tərəfi də artıq özünü inandırdı ki, Azərbaycanla mütləq dil tapmaq, Azərbaycanın haqlı tələblərinə uyğun davranmaq lazımdır. Bu baxımdan, Ermənistan Azərbaycanın sülh çağırışlarına reaksiya verməyə başlayıb. Nəzərə almaq lazımdır ki, sərhədlərin delimitasiyası və demarkasiyası prosesi artıq bir neçə ildir davam edir və bu istiqamətdə hər iki tərəfin hökumət komissiyaları fəaliyyət göstərir. Onlar arasında intensiv görüşlər və müzakirələr həyata keçirilir. 2024-cü ildə də məhz sözügedən istiqamətdə, yəni Qazax rayonu üzrə Azərbaycan-Ermənistan sərhədinin delimitasiyası və demarkasiyası həyata keçirilmişdi. Buna əsasən, həmin ərazilərin Azərbaycanın nəzarətinə qaytarılması nəzərdə tutulurdu. Yəni Bağanis Ayrım, Aşağı Əskipara, Xeyrimli və Qızılhacılı kəndlərinin döyüşsüz şəkildə Azərbaycana qaytarılması, bir daha qeyd edim ki, bizim qələbəmizin nəticəsidir”.

Politoloqun sözlərinə əsasən, Ermənistan artıq Azərbaycanın haqlı mövqelərinə uyğun addımlar atırsa, bu, Azərbaycanın irəli sürdüyü sülh gündəliyinə razılaşdığını göstərir və tərəflər arasında gözlənilən sülhün əldə olunması istiqamətində növbəti addım kimi qiymətləndirilir:

“Nəzərə almaq lazımdır ki, Ermənistanla Azərbaycan arasında sərhədlərin delimitasiyası və demarkasiyası prosesi bundan sonra da bir neçə il davam edəcək. Lakin Qazax istiqamətində 5 döyüş postunun Azərbaycanın nəzarətinə qaytarılması bizdə belə bir təsəvvür formalaşdırır ki, bu proses bundan sonra da uğurla davam etdiriləcək. Delimitasiya və demarkasiya nəticəsində sərhədlər dəqiq müəyyənləşdiriləcək və ölkələr öz sərhədləri çərçivəsində ərazilərə tam nəzarəti təmin edəcəklər. Burada əsasən Azərbaycan nəzərdə tutulur, çünki Azərbaycan torpaqları və sərhəd xətləri uzun müddət Ermənistanın işğalı altında olub. Yəni biz sərhəd xətlərimizi dəqiqliklə Ermənistanın nəzarətindən çıxararaq öz nəzarətimizə keçirməkdəyik. Bu prosesin getdiyini görürük və hesab edirəm ki, artıq ortada həm etimadın formalaşdırılması, həm sülhün əldə olunması, həm də regionda yeni əməkdaşlıq münasibətlərinin qurulması üçün ilkin şərtlər mövcuddur. Lakin bir daha vurğulamaq lazımdır ki, bütün bunlar Azərbaycan Prezidentinin, Azərbaycan dövlətinin və ordumuzun iradəsi və gücünün nəticəsidir”.

Bəsti Rəfizadə

Sfera.az

Ermənistanın döyüş postlarını səssiz verməsi hansı mesajı ötürür? - ŞƏRH