Azərbaycanın daşınmaz əmlak bazarında ən çox müqayisə edilən şəhərlərdən biri Bakı, digəri isə Sumqayıtdır. Son illərdə paytaxtda mənzil qiymətlərinin sürətlə artması bir çox vətəndaşı daha münasib qiymətli alternativlər axtarmağa sövq edib. Bu baxımdan Sumqayıt alıcıların diqqət mərkəzinə çevrilib. Bəs iki şəhər arasında mənzil qiymətlərindəki fərq nə qədərdir və bu fərqi yaradan əsas amillər hansılardır?

Bakı ölkənin iqtisadi, inzibati və biznes mərkəzi hesab olunur. Dövlət qurumlarının, iri şirkətlərin, universitetlərin və əsas iş yerlərinin böyük hissəsi paytaxtda yerləşir. Bu isə mənzilə olan tələbatı daim yüksək saxlayır.

Sfera.az xəbər verir ki, hazırda Bakıda yeni tikililərdə mənzillərin orta satış qiyməti hər kvadratmetr üçün təxminən 2 800-3 100 manat arasında dəyişir.

Şəhərin mərkəzi hissələrində və prestijli ərazilərdə isə bu göstərici 4 000 manatı da ötür. Məsələn, 70 kvadratmetrlik bir mənzilin qiyməti orta hesabla 190 000-220 000 manat arasında dəyişə bilir.

Sumqayıtda isə vəziyyət fərqlidir. Şəhərdə mənzillərin orta satış qiyməti hər kvadratmetr üçün 1 700-1 800 manat səviyyəsindədir. Bu səbəbdən 70 kvadratmetrlik mənzilə təxminən 120 000-130 000 manata sahib olmaq mümkündür. Beləliklə, eyni sahəyə malik mənzillər arasında Bakı və Sumqayıt üzrə qiymət fərqi orta hesabla 70 000-90 000 manat təşkil edir. Kvadratmetr üzrə müqayisədə isə fərq təxminən 1 000-1 300 manatdır.

Bu fərqin əsas səbəbi Bakıda iş yerlərinin, biznes mərkəzlərinin və sosial infrastrukturun daha çox cəmləşməsidir. Paytaxtda metro şəbəkəsinin mövcudluğu, nəqliyyat imkanlarının genişliyi və investisiya məqsədilə mənzil alışına yüksək maraq qiymətlərin daha yüksək olmasına səbəb olur. Digər tərəfdən, Bakıda torpaq ehtiyatlarının məhdud olması yeni layihələrin maya dəyərini artırır.

Sumqayıtda isə torpaq ehtiyatlarının daha geniş olması və tikinti imkanlarının nisbətən əlverişli qalması qiymətlərin aşağı səviyyədə formalaşmasına şərait yaradır. Bununla belə, son illərdə Bakı-Sumqayıt yolunun yenilənməsi, nəqliyyat əlaqələrinin yaxşılaşması və şəhərdə həyata keçirilən abadlıq layihələri daşınmaz əmlak bazarına marağı artırıb. Hazırda minlərlə insan Sumqayıtda yaşayaraq Bakıda işləyir ki, bu da şəhərdə mənzilə tələbatı yüksəldən əsas amillərdən biridir.

Maraqlı məqamlardan biri də odur ki, son illərdə Bakı ilə Sumqayıt arasında qiymət fərqi tədricən azalır. Sumqayıtda mənzillərin qiyməti son iki ildə təxminən 25-30 faiz artıb. Mütəxəssislər hesab edirlər ki, Bakıda qiymətlərin yüksək qalması fonunda daha münasib seçim axtaran alıcıların Sumqayıta üz tutması bu tendensiyanı gücləndirir.

Nəticədə Bakı hələ də ölkənin ən bahalı daşınmaz əmlak bazarı olaraq qalsa da, Sumqayıt həm qiymətlərin daha münasib olması, həm də paytaxta yaxınlığı səbəbindən alıcılar üçün cəlbedici alternativə çevrilib. Məhz bu amillər son illərdə Sumqayıtda mənzil satışlarının və qiymətlərin artmasına səbəb olan əsas faktorlar kimi qiymətləndirilir.

Ev almaq istəyənlər üçün müqayisə: Bakı, yoxsa Sumqayıt?