İnsan orqanizmi şəkərə enerji mənbəyi kimi ehtiyac duysa da, şirniyyatların tez-tez və nəzarətsiz qəbulu həm metabolik proseslərə, həm də ümumi sağlamlığa mənfi təsir göstərə bilər. Sfera.az xəbər verir ki, mütəmadi şəkildə yüksək şəkərli məhsullar qəbul etmək qısa müddətli enerji artımına səbəb olsa da, uzunmüddətli perspektivdə riskləri daha çoxdur.

Şirniyyatların az miqdarda və balanslı şəkildə qəbulu bəzi hallarda psixoloji rahatlama, beyində xoşbəxtlik hormonlarının müvəqqəti artması kimi təsirlər yarada bilər. Bu isə stresli həyat tərzi yaşayan şəxslərdə əhvalın qısa müddətlik yaxşılaşmasına səbəb olur. Eyni zamanda, tərkibində qoz, badam və ya təbii kakao olan keyfiyyətli şirniyyatlar bədəndə antioksidant təsir göstərə bilər.

Lakin araşdırmalar şirniyyat istehlakının mənfi tərəflərinin daha geniş olduğunu üzə çıxarır. Şəkərin tez-tez qəbulu qanda qlükozanın sürətlə yüksəlib-enməsinə səbəb olaraq insulin dirənci riskini artırır. Bunun fonunda piylənmə, qaraciyər yağlanması, diş çürümələri və ürək-damar xəstəlikləri kimi problemlərin yaranma ehtimalı xeyli çoxalır. Xüsusilə boş kalori hesab edilən hazır şirniyyatlar bədənin vitamin-mineral ehtiyacını qarşılamadığına görə enerji çatışmazlığı və yorğunluq hissini də artırır.

Araşdırma onu da göstərir ki, şirniyyatın gündəlik qəbulu psixoloji asılılıq yarada bilər. Şəkərdən imtinanın çətinləşməsi isə pəhriz və arıqlama proseslərinə mane olur.

Şirniyyat istehlakını azaltmaq, həftəyə maksimum 1–2 dəfə olmaqla məhdudlaşdırmaq daha sağlam yanaşma sayıla bilər. Enerji ehtiyacı üçün isə daha çox meyvələr, tam taxıllar və zülal mənbələri seçilməlidir.

Şirniyyat tam qadağan olunmasa da, onun tez-tez qəbulu sağlamlıq üçün ciddi risk yaradır və balanslı qidalanma prinsipləri daxilində məhdudlaşdırılmalıdır.

Niyaz Hacıyev
Sfera.az

Şirniyyat sevgisi psixoloji asılılığa çevrilirmiş - ARAŞDIRMA