Yaponiyanın Tokio yaxınlığında yerləşən İchikava şəhərindəki zooparkda yaşayan yeddi aylıq bala meymun Panç sosial mediada yayılan videosu ilə bütün dünyanın diqqətini çəkib.

Sfera.az-ın xarici mediaya istinadən verdiyi məlumata görə, həmin görüntülərdə Panç anasının himayəsindən məhrum olub və yumşaq orangutan oyuncağına sarılaraq təsəlli tapıb. Bu görüntülər qısa zamanda milyonlarla baxış və paylaşım toplayıb.

Zooparkdakı vəziyyətin dünya miqyasında populyarlaşması turistləri cəlb edib və ziyarətçi sayında ciddi artım müşahidə olunub. Bu isə yerli heyvanat bağçasının ziyarətçi zonasını məhdudlaşdırmasına səbəb olub. Lakin hekayənin daha tənqidi bir tərəfi də var. İctimaiyyətin diqqətini çəkən yumşaq oyuncağa artan tələbat nəticəsində həmin oyuncağı satan şirkətlər üçün yeni bir bazar yaranıb.

Belə ki, orangutan oyuncağı viral fenomenə çevrilərək bir çox ölkədə satışa çıxıb və hətta satış platformalarında orijinal qiymətindən xeyli baha satılıb. Heyvan haqları müdafiəçiləri bu duruma münasibət bildirərək tənqidlərini artırıb. PETA kimi qurumlar belə hekayələri “biznesə çevirmək” əvəzinə, Panç kimi heyvanların daha təbii və uyğun şəraitə malik sığınacaqlara köçürülməsinin vacibliyini vurğulayıblar.

Onların fikrincə, təbii yaşamaqdan məhrum edilmiş heyvanların taleyi əyləncəyə və kommersiyaya çevrilməməlidir. Bu birlikdə həm ürəkaçan, həm də mübahisəli bir məsələ yaradıb: bir tərəfdən internet Pançın dərdini ürəkdən izləyir, digər tərəfdən bəzi şirkətlər bu hekayədən öz mənfəətləri üçün istifadə etməyə başlayıb.

Mənsumə

Sfera.az

Viral olan oyuncağın satışı rekord qırdı