Su niyə rejimlə verilir? - Sədr AÇIQLADI

"Hazırda Bakı və Abşeron yarımadasında əhalinin təxminən 80 faizi fasiləsiz, yəni 24 saat ərzində su ilə təmin olunur".

 

Sfera.az xəbər verir ki, bunu Dövlət Su Ehtiyatları Agentliyinin sədri Zaur Mikayılov "Baku Water Week" çərçivəsində keçirilən 2-ci Beynəlxalq Su Təsərrüfatı Sərgi və Konfransında jurnalistlərə bildirib.

 

Onun sözlərinə görə, Abşeron yarımadasının bəzi yerlərində, eləcə də Bakının müəyyən rayonlarında su çatdırılmasında hələ də rejim tətbiq olunur:

 

"Suyun paylanması sistemində yenilənmə və yeni mənbələrin yaradılması istiqamətində genişmiqyaslı layihələr həyata keçirilir. Hal-hazırda duzsuzlaşdırma sahəsində də işlər aparılır. Bundan əlavə, suyun təkrar emalı və yenidən istifadə edilməsi ilə bağlı tədbirlər planlaşdırılıb. Bu işlər başa çatdıqdan sonra suyun həcmi artacaq və şəbəkənin genişlənməsi ilə əhali su təminatında daha rahatlıq yaşayacaq. Lakin 24 saat suyun verilməsi israfçılıq demək deyil və suyu qənaətlə istifadə etmək vacibdir," - Zaur Mikayılov vurğulayıb.