Kitab oxumaq yalnız əyləncə deyil, həm də beyin sağlamlığı və ümumi həyat keyfiyyəti ilə əlaqələndirilən mühüm vərdişlərdən biridir. Müxtəlif elmi araşdırmalar göstərir ki, mütəmadi oxumaq stressin azalmasına, yaddaşın güclənməsinə və yaşlanma ilə bağlı idrak geriləməsinin daha yavaş baş verməsinə kömək edə bilər.

Sfera.az xəbər verir ki, “Yale School of Public Health” tərəfindən aparılan uzunmüddətli tədqiqatda 50 yaşdan yuxarı minlərlə insan 12 il ərzində izənilib. Nəticələr göstərib ki, mütəmadi kitab oxuyan insanlar oxumayanlara nisbətən orta hesabla təxminən 2 il daha uzun yaşayır.

Psixoloq Raymond Mar və digər tədqiqatçılar bildirirlər ki, xüsusilə bədii ədəbiyyat oxumaq insanın empatiya qabiliyyətini artırır. Oxucu hekayələr vasitəsilə fərqli insanların düşüncə və emosiyalarını “yaşayır”, bu da sosial anlayışı və emosional intellekti gücləndirir. Bu proses beynin sosial əlaqələrlə bağlı sahələrini aktiv saxlayır və insanın real həyatda daha yaxşı ünsiyyət qurmasına kömək edir.

Oxumağın digər mühüm təsiri stresslə bağlıdır. Kitab oxuyarkən insan diqqətini tam şəkildə mətnə yönəltdiyi üçün beyin gündəlik gərginlikdən uzaqlaşır və daha sakit vəziyyətə keçir. Bu da stress hormonlarının azalmasına səbəb ola bilər. Bundan əlavə, araşdırmalar göstərir ki, mütəmadi oxumaq beyni aktiv saxlayır və yaddaş, diqqət, dil bacarıqları ilə təxəyyülü gücləndirir.

Bu vərdiş demensiya və Alzheimer xəstəliklərinin qarşısını tam almasa da onların təsirini zəiflədərək zehni sağlamlığın daha uzun müddət qorunmasına kömək edə bilər. Ümumilikdə, kitab oxumaq həm zehni, həm emosional, həm də sosial baxımdan insanı inkişaf etdirən sadə, amma çox güclü bir vərdiş kimi qiymətləndirilir.

Mənsumə

Sfera.az

Kitab oxumaq bu xəstəliklərdən qoruyur və ömrü 2 il uzadır