Uşaq bağçadan müəmmalı şəkildə yoxa çıxıb: Baba səhvən başqasının uşağını götürüb
Avstraliyanın Sidney şəhərində gülməli vəziyyət baş verib.
Belə ki, uşaqlardan biri uşaq bağçasından yoxa çıxıb, bir neçə saatdan sonra tapılıb. Məlum olub ki, onu təhsil müəssisəsindən nəvəsini götürməyə gələn bir baba aparıb. O, nəvəsini başqa uşaqla səhv salıb.
Sfera.az bildirir ki, hazırda polis hadisəni və təhsil müəssisəsinin nümayəndələrinin buna necə icazə verdiyini araşdırır.
Hər şey ananın körpəni İlk Addımlar Öyrənmə Akademiyasından götürməyə gələndə başlayıb. Amma məlum olub ki, oğlu orada deyil. İşçilər təşviş içində kameralardan gələn görüntülərə baxıb və uşaqların hamısının orada olduğundan əmin olmaq üçün digər valideynlərə zəng etməyə başlayıblar.
Sonradan məlum olub ki, nəvəsini götürməyə gələn qoca səhvən başqa bir uşağı götürüb, uşağa fikir verməyib. Babanın həyat yoldaşı jurnalistlərə bildirib ki, kişi uşaqlar yatanda və otaq qaranlıq olanda gəlib.
"Sadəcə uşağı götürüb maşına mindirib gedib. Həmin vaxt avtomobil oturacağı ilə məşğul olub, detallara fikir verməyib.
O, nadir hallarda belə edir. Evə gələndə uşağı qucaqlayıb yatmağa gedib. Nəvəsinin sadəcə kefi olmadığını düşünüb. Uşaq eyni saç düzümündə və ağzında əmzik olub"- deyə qadın bildirib. Cütlük bir neçə gün əvvəl nəvəsinin xəstələndiyi və dişləri çıxanda ona baxdıqlarını, ona görə də uşağın davranışında qeyri-adi bir şey olmadığını düşündüklərini deyirlər.
Təhsil müəssisəsi rəhbərliyi hadisəni ciddi və dərin narahatlıq doğuran adlandıraraq tam araşdırma elan edib. Bağçanın sözçüsü Tricia Hastie hadisəyə görə ailələrdən üzr istəyib. "Biz bu qeyri-adi, lakin son dərəcə kədərli hadisəyə görə ürəkdən təəssüf hissi keçiririk. Hər bir uşağın təhlükəsizliyi bizim ən yüksək prioritetimizdir"- deyə təhsil tənzimləyicisinin sözçüsü bildirib. O, səhvə yol vermiş işçinin işdən kənarlaşdırıldığını və təhvil-təslim protokollarının dərhal nəzərdən keçirildiyini təsdiqləyib. Mərkəz bu cür hadisənin nə Banqorda, nə də başqa yerlərdə əvvəllər heç vaxt olmadığını bildirib.
