Xərçəng xəstəliklərinin artdığı bir dövrdə müalicə üsulları ilə yanaşı, qidalanmanın rolu da gündəmdədir. Mütəxəssislər hesab edirlər ki, düzgün qida vərdişləri həm onkoloji xəstəliklərin qarşısının alınmasında, həm də müalicə prosesinin effektivliyinin artırılmasında mühüm əhəmiyyət daşıyır. Bəs qida əsaslı yanaşmalar xərçənglə mübarizədə yeni bir dövrün başlanğıcı ola bilərmi?

Sfera.az bildirir ki, mövzu ilə bağlı konkret.az-a açıqlama verən tibb üzrə fəlsəfə doktoru, həkim-onkoloq Fərid Museyibov bildirib ki, qida qəbulunun düzgün aparılması sağlamlıq üçün əsas şərtlərdən biridir. Onun sözlərinə görə, insan qidanı qəbul etdikdən sonra doyma siqnalı beyinə təxminən 20 dəqiqə ərzində çatır. Lakin bir çox hallarda insanlar bu müddəti nəzərə almadan sürətlə qidalanır ki, bu da sonradan mədə-bağırsaq problemlərinə yol açır.

“Qida qəbul edilərkən yeməyin yaxşı çeynənməsi vacibdir. Bu, həm həzm prosesini asanlaşdırır, həm də mədə-bağırsaq sisteminin yüklənməsinin qarşısını alır”.

Fərid Museyibov qeyd edib ki, onkoloji xəstələrdə qidalanma məsələsi xüsusilə həssasdır və həm əməliyyatdan əvvəl, həm də sonrakı dövrdə bu amilə ciddi diqqət yetirilməlidir.

“Qidalanma tövsiyələri xərçəngin hansı orqanla bağlı olmasından asılı olaraq dəyişir. Xüsusilə, mədə və qida borusu xərçənglərində qida rejimi daha ciddi nəzarətdə saxlanılmalıdır”.

Mütəxəssis fastfood məhsullarından, dönər, çips, eləcə də emal olunmuş kolbasa və sosis kimi qidalardan uzaq durmağı tövsiyə edib. O, bildirib ki, bu cür məhsulların az istehlakı onkoloji xəstəliklərə tutulma riskinin azalmasına kömək edə bilər.

Həkim-onkoloq içkilərlə bağlı da xəbərdarlıq edərək bildirib ki, çox isti çay və qaynar su qida borusu və mədə-bağırsaq xərçənglərinin yaranmasına səbəb ola bilən risk faktorlarındandır. Bu baxımdan içkilərin həddindən artıq isti halda qəbul edilməməsi tövsiyə olunur.

Sonda Fərid Museyibov alkoqol və tütün məmulatlarından uzaq durmağın xərçəng riskinin azaldılmasında mühüm rol oynadığını vurğulayıb. Onun sözlərinə görə, sağlam qidalanma və düzgün həyat tərzi onkoloji xəstəliklərlə mübarizədə əsas dayaqlardan biridir.

Xərçənglə mübarizədə YENİ DÖVR: Bunları etsəniz, xəstəliyə qalib gələcəksiz