Yeni planet kəşf edildi

Astronomlar Yer kürəsindən cəmi 20 işıq ili uzaqlıqda olduqca qeyri-adi bir dünyanı aşkarlayıblar.

Sfera.az xəbər verir ki, bu, heç bir ulduzun ətrafında fırlanmayan, kosmosda təkbaşına hərəkət edən nəhəng planetdir.

Məlumata görə, bu göy cismi Yupiterdən təxminən 13 dəfə ağırdır və onun atmosferi çox mürəkkəb quruluşa malikdir. “James Webb” Kosmik Teleskopunun köməyi ilə aparılan müşahidələrdə planetdə qum dənəciklərinə bənzəyən silikat və dəmirdən ibarət bulud layları, dəyişən istilik nöqtələri və dərinlikdən asılı olaraq fərqli karbon kimyası aşkar edilib.

“SIMP 0136” adlandırılan bu planet həm də çox güclü maqnit sahəsinə sahibdir. Elm adamlarının hesablamalarına görə, onun maqnit sahəsi Yerin sahəsindən 4 milyon dəfə güclüdür. Bu, planetin səmasında nəhəng və işıqlı avroraların yaranmasına səbəb ola bilər.

Bundan əlavə, planet çox sürətlə fırlanır, o,  cəmisi 2,4 saata bir tam dövr edir. Bu isə o deməkdir ki, onun görünüşü bircə gecə ərzində dəyişə bilir.

Hazırda alimlər hələ də “SIMP 0136”nın tam olaraq nə olduğunu müəyyənləşdirməyə çalışırlar – bu, adi bir planetdirmi, yoxsa ulduzla planet arasında qalan “qəhvəyi cırtdan” adlanan obyekt? Araşdırmaçı Allison McCarthy-nin sözlərinə görə, “SIMP 0136 gözləniləndən qat-qat mürəkkəb çıxıb”.

Firuzə Əliyeva
Sfera.az