Bilik verməli olan məktəblər niyə skandallarla gündəmə gəlir? - AÇIQLAMA
11:12 / 08.01.2022
1105
Ötən gün paytaxt məktəblərinin birində şagirdin döyülmə xəbəri sosial mediada müzakirə obyektinə çevrilib. Kimi bunu tənqid etsə də, kimi vaxtikən məktəbdə çox döyüldüyünü nümunə çəkərək normal qarşılayıb və valideynlərin aqressivliyinin yersiz olduğunu bildirib.
Bununla bağlı Sfera.az-a açıqlama verən təhsil eksperti Kamran Əsədov qeyd edib ki, hazırda döyən müəllimin, direktorun sərt tənqid edilmə səbəbi məktəbin öz funksiyasını yerinə yetirə bilməməsidir:
"Əvvəllər şagirdlər orta məktəbdə minimum zəruri bilik və bacarıqlara yiyələnirdi. Məktəb şagirdlərinə həm bilik, həm bacarıqlar, həm də tərbiyə verirdi. Valideyn demək olar ki, bu istiqamətdə heç bir iş görmürdü. Bəs indi necədir vəziyyət? Şagirdlər az qala dünyaya göz açandan repetitor yanına, hazırlıq kurslarına gedir. Əlbəttə ki, valideynlərin vəsaiti hesabına. Yəni valideynlər şagird üçün indi həm maddi, həm mənəvi digər bütün resurslarını səfərbər edir. Bu o deməkdir ki, məktəbin pulsuz görməli olduğu işi valideynləri pulla görür. Bunun ardınca valideyn məktəbə gəlib haqlı iradını bildirir ki, sən mənimlə birlikdə övladımı böyütmüsən ki, onu döyürsən?”.
Ekspert bildirib ki, məktəb öz məsuliyyətini dərk etmir və öhdəliklərini yerinə yetirmir:
"Məktəbi idarə edənlərin bunları yerinə yetirməyə bilik və bacarıqları çatmadığı üçün də fiziki zorakılığa üz tuturlar. Bu fikirlər o demək deyil ki, mən 10-15 il əvvələ qədər şagird döyülməsinə haqq qazandırıram. Xeyr, heç bir halda şagird döyülə bilməz. Şagirdə fiziki zorakılıq tətbiq etmək yolverilməzdir”.
Xatırladaq ki, ötən gün paytaxtda fəaliyyət göstərən 9 nömrəli tam orta məktəbin direktoru Zinyət Əhmədovanın təhsil ocağında şagirdləri döyməsi barədə məlumat yayılmışdı.
Günay Rəsulqızı
Sfera.az
